Напапярдні з’езду арыштоўваюць актывістаў Саюзу палякаў :: Хартыя'97 :: Навiны

Міліцыянты затрымалі ў Шчучыне двух гарадзенцаў — актывіста Саюзу палякаў журналіста Андрэя Пачобута і карэспандэнта газэты “Салідарнасьць” Івана Романа. Іх даставілі ў гарадзенскі Ленінскі РАУС, а потым завезьлі назад у Шчучын і, паводле апошняй інфармацыі, пакінулі ў пастарунку да раніцы. А тым часам у Ваўкавыску затрымалі кіраўніка Гарадзенскага гарадзкога аддзелу Саюзу палякаў Мечыслава Яскевіча — нібыта для высьвятленьня ягонай асобы.

Супрацоўніца Польскага тэлебачаньня Агнешка Рамашэўска прыехала ў Шчучын, каб пацікавіцца лёсам затрыманых журналістаў. Яе затрымалі міліцыянты, хацелі забраць відэакасэту, але неўзабаве яны адпусьцілі польскую журналістку.

Нагадаем, што сёньня ў Горадні ў міліцыю выклікалі старшыню Саюзу палякаў Анжаліку Борыс, яе намесьніка Веслава Кеўляка і журналіста Анджэя Пісальніка. Анджэй лічыць, што гэта ня проста зьбег акалічнасьцяў, уся гэтая кампанія запалохваньня зьвязана з заўтрашнім паўторным зьездам Саюзу палякаў, які мае адбыцца у Ваўкавыску.

“Улады баяцца нашай прысутнасьці. Напэўна нават не таго, што можа адбыцца нейкая акцыя пратэсту, нейкая маніфэстацыя, а магчыма таго, што нашая прысутнасьць неяк паўплывае на дэлегатаў, якіх загналі на гэты зьезд амаль сілай, прынамсі пад прымусам”, -- паведаміў “Радыё Свабода” Анджэй Пісальнік.