Журналіста затрымаў ўзброены спецназ :: Хартыя'97 :: Навiны

1 верасня ў вёсцы Дарашэвічы Петрыкаўскага раёна ўзброеная група спецназу пад кіраваннем маёра С. Кутасава затрымала на 1,5 гадзіны журналіста, кіраўніка Гомельскай арганізацыі ГА "Беларуская асацыяцыя журналістаў" Анатоля Гатоўчыца.

Як паведамляе прэс-служба БАЖ, журналіст браў інтэрв`ю ў жыхароў вёскі і фатаграфаваў агароджу, што аддзяляе Дарашэвічы ад ракі Прыпяць. (Фотарэпартаж прызначаўся для газеты "Народная воля"). У А. Гатоўчыца журналіста забралі два дыктафоны SONY (лічбавы і касетны), фотаапарат "Зеніт", а таксама абшукалі аўтамабіль, з якога забралі 4 аўдыёкасеты з музыкай. Тэхніку карэспандэнту дагэтуль не аддалі.

Кіраўнік групы спецназу звязваўся з некім па рацыі, а на пытанне журналіста, ці парушыў ён якія-небудзь правілы, адказаў: "Нічога не парушыў, але трэба пачакаць начальства". Прыкладна праз гадзіну на белым мікрааўтобусе "Мерседес" №21-40 КЕ прыехаў малады чалавек у цывільным, які назваўся кіраўніком службы аховы прэзідэнта Уладзімірам Мікалаевічам і заявіў, што ў сувязі з прыездам Аляксандра Лукашэнкі ў Петрыкаўскі раён праводзіцца аперацыя "Антытэрор", у межах якой неабходна прад`яўляць на праверку дыктафоны, фотаапараты і ўсю іншую тэхніку. Ахова сцвярджала, што на момант знаходжання А. Гатоўчыца ў вёсцы Дарашэвічы Аляксандр Лукашэнка быў у сваёй летняй рэзідэнцыі на Прыпяці непадалёк ад гэтага месца.