Кангрэс дэмакратычных сілаў не атрымаў гарантый ад уладаў :: Хартыя'97 :: Навiны

Арганізацыйны камітэт Кангрэсу дэмакратычных сілаў пакуль не атрымаў ад уладаў пісьмовага пацьверджаньня і гарантый таго, што кангрэс можа прайсьці ў Беларусі. На гэтым кангрэсе апазыцыйныя арганізацыі Беларусі маюць намер вылучыць адзінага кандыдата на прэзыдэнцкія выбары наступнага году.

Падчас наведваньня гіпермаркета "Гіпа" у Менску Аляксандар Лукашэнка заявіў, што ён даручыў органам улады аказаць дапамогу ў правядзеньні кангрэсу. Прайшло ўжо некалькі дзён, аднак аргкамітэт пакуль не атрымаў адпаведнага дакумэнта. Пакуль, як заяўляюць у аргкамітэце кангрэсу, ёсьць толькі забарона ад менскіх уладаў на правядзеньне кангрэсу дэмсілаў.

Калі раней старшыня Мінгарвыканкама Міхаіл Паўлаў назваў пяць варыянтаў для магчымага правядзеньня кангрэсу -- палацы менскага аўтазавода, чыгуначнікаў, трактарнага завода, "Камволь" і "Сукно", то 9 верасня А. Лукашэнка назваў толькі адзін варыянт памяшканьня - "Сукно".

“У пэўным сэнсе правакацыйны характар маюць гэтыя дзеяньні, таму што "Сукно" знаходзіцца на рамонце, мы там ужо былі. Прычым цяпер гэта не "Сукно", там ужо іншы ўласьнік. Гэта памяшканьне “Джэм-банка”. Яны скончаць рамонт толькі ў студзені, а нам трэба правесьці кангрэс напрыканцы верасьня. Нам падыходзяць тры з названых заляў. Гэта Палацы чыгунчанікаў, аўтазавода і трактарнага. Калі нам не дадуць адно з гэтых памяшканьняў, то ўсе словы пустыя: Лукашэнка ў чарговы раз згуляў на публіку і ўвёў у зман наш народ", -- паведаміў “Радыё Свабода” старшыня аргкамітэту кангрэсу дэмсілаў Аляксандар Бухвостаў.

Старшыня аргкамітэту кангрэсу дэмсілаў адзначае, што месяц таму ў названыя Міхаілам Паўлавым палацы ўжо былі накіраваныя запыты на арэнду заляў. "Камволь" адмовіў, адміністрацыі астатніх заляў наагул прамаўчалі.