Акцыя ў Нью-Ёрку супраць візыта Лукашэнкі :: Хартыя'97 :: Навiны

Актывісты беларускай дыяспары правялі 14 верасня акцыю пратэсту, прымеркаваную да прыезду Аляксандра Лукашэнкі на сэсію ААН. Акцыя пачалася на 5-й авэню каля Нью-Ёрскай публічнай бібліятэкі. Прадстаўнікі дыяспары прайшлі пад бел-чырвона-белымі сьцягамі да будынку Арганізацыі Аб`яднаных нацыяў. Сярод плякатаў і лёзунгаў, якія трымалі дэманстранты: "Мы хочам свабоднай, незалежнай і дэмакратычнай Беларусі!", "Спыніце дыктатуру Лукашэнкі!".

Адметнасьць акцыі ў тым, што беларусам удалося заняць самае лепшае месца пікетаваньня - ўдзельнікі акцыі стаялі адразу ля агароджанага для прэсы і супрацоўнікаў ААН праходу. Усе, хто ішлі ў будынак ААН, праходзілі каля бел-чырвона-белых сьцягоў і чулі лёзунгі "Belarus - YES!, Lukashenka - NO!".

У акцыі таксама прыняў удзел старшыня Кансэрватыўна-хрысьціянскай партыі БНФ Зянон Пазьняк.

Беларуская дэманстрацыя не адзіная ў Нью-Ёрку. У прыватнасьці, іранская, кубінская ды шэраг іншых дыяспараў таксама будуць ладзіць дэманстрацыі і пікеты пратэсту.