Беларускіх правабаронцаў затрымалі на мяжы :: Хартыя'97 :: Навiны

У Варшаве гэтымі днямі праходзіць канферэнцыя АБСЕ па пытаннях унутранага незалежнага назірання за выбарамі. На канферэнцыю запрошаныя таксама актывісты беларускай грамадзянскай ініцыятывы “Партнёрства”, якія праводзілі незалежнае назіранне за выбарамі ў 2004 годзе. Па дарозе ў Варшаву яны былі, аднак, затрыманыя беларускімі памежнымі службамі, якія адмаўляліся прапусціць іх праз мяжу. У актывістаў “Партнёрства” былі адабраныя друкаваныя матэрыялы, у тым ліку выдадзеная ініцыятывай “Партнёрства” кніга “Рэферэндум і выбары ў “палату прадстаўнікоў” 2004 года”, што распавядае пра шматлікія правапарушэнні ў ходзе выбараў.

Кіраваў затрыманнем інспектар Прадко І.А. Пры гэтым ніякіх законных падставаў для затрымання і канфіскацыі матэрыялаў не было. Самі памежнікі адмовіліся тлумачыць сапраўдную прычыну канфіскацыі, абмежаваўшыся наступным тлумачэннем: “материалы изъяты как товары, транспортные средства и документы на них, которые не являются непосредственными объектами административно-таможенных правонарушений, но, в силу установленных законодательством запретов и ограничений, не подлежащие перемещению через таможенную границу Республики Беларусь, и в связи с отказом лица, в собственности (владении) которого находятся данные товары, транспортные средства и документы на них, добровольно распорядиться ими».