Vox populi: Ці вы будзеце браць удзел у Дне салідарнасьці 16 кастрычніка? :: Хартыя'97 :: Навiны

Прадстаўнікі грамадзянскай супольнасці заклікалі беларусаў узяць удзел у Дне салідарнасьці з ахвярамі палітычных рэпрэсіяў — 16 кастрычніка а 20-й гадзіне пагасіць сьвятло і запаліць сьвечкі ў сваіх вокнах на знак салідарнасьці зь беларускімі палітычнымі вязьнямі, зьніклымі і іх сем’ямі, незалежнымі журналістамі, з усімі тымі, хто змагаецца за свабоду і дэмакратыю ў Беларусі Як ставяцца людзі да Дня салідарнасьці і ці гатовыя яны ўзяць у ёй удзел? Гэта на менскіх вуліцах высьвятляла карэспандэнтка “Радыё Свабода”.

“Чаму не? У мяне шмат сяброў, якія чулі пра такія акцыі і гатовыя браць у іх удзел. У нашай кампаніі гэтыя тэмы актыўна абмяркоўваюцца”.

“Не, сам удзельнічаць я ня буду. Я даволі апалітычны чалавек, таму не бяру ўдзелу ў нейкіх акцыях. Я лічу, што гэта не павінна быць прымеркавана да нейкай даты ці моманту. Проста людзі павінны ведаць пра гэта і памятаць аб гэтым. Лічу, што гэта заўсёды павінна быць з намі”.

“Нам усё падабаецца”.

“Канечне, трэба памятаць пра рэпрэсаваных і бязьвінна асуджаных. Вядома, акцыя гэтая добрая паводле ўнутранага зьместу. Я проста пра гэта ня чуў, але добра, што будзе акцыя, каб людзі не забываліся і памяталі. Ці вазьму я ў ёй удзел, яшчэ ня ведаю. Мне патрэбна мець пра гэта больш інфармацыі. Трэба больш падрабязна паведамляць людзям, тады будзе больш удзельнікаў у акцыях, і будзе больш салідарных з роднымі і блізкімі ахвяраў”.

“Магчыма, я гатовая ўзяць удзел. Але пра гэтую акцыю не хапае інфармацыі, паколькі я нічога пра яе ня ведала”.

“Нармальна стаўлюся. Магу падтрымаць усю гэтую справу”.

“Напэўна, не. Я далёкі ад гэтых акцыяў, не бяру ўдзелу ні ў чым. Нэўтралітэт — гэта самае лепшае”.

“Я не гатовы ўзяць удзел у гэтай акцыі, таму што пытаньні, якія ўздымаюцца ў гэтай акцыі, не асьветленыя ў прэсе. На тэлебачаньні, па радыё нельга пра гэта пачуць. Я і мае сябры ня чулі пра гэта, і я ўпершыню чую пра гэта ад вас”.

“Я мяркую, што гэта сапраўды будзе нейкай салідарнасьцю і знакам супраць рэпрэсіяў, супраць таго, што цяпер адбываецца ў сьвеце і ў нашай дзяржаве”.