Пагоршыўся стан здароўя палітвязня Міхаіла Марыніча :: Хартыя'97 :: Навiны

Палітвязня, былога міністра і дыпламата Міхаіла Марыніча ў калёніі наведала адвакат Валянціна Шаханцова, якая пацьвердзіла, што ягоны стан здароўя пагоршыўся. “Стан ягонага здароўя на сёньняшні дзень можна лічыць нездавальняючым. Ягоная хвароба такая, што час ад часу ўзьнікаюць складанасьці”, -- паведаміла адвакат “Радыё Свабода”.

Увесну ў аршанскай калёніі Міхаіл Марыніч перанёс інсульт, наступствы якога ўскладніліся тым, што хворы некалькі дзён не атрымліваў неабходнай мэдычнай дапамогі. У выніку палова тулава была часткова паралізавана. Да гэтага часу не вярнулася былая адчувальнасьць рукі і нагі хворага. Акрамя гэтага, Міхаіл Марыніч пакутуе на сэрца, у яго пагоршыўся зрок.

Адвакат нагадала, што ўсяго Міхаіл Марыніч мае пяць хваробаў са сьпісу захворваньняў, кожнае зь якіх ёсьць падставай для датэрміновага вызваленьня. Тыдзень таму начальніку менскай калёніі было пададзенае хадайніцтва аб датэрміновым вызваленьні Міхаіла Марыніча з прычыны стану здароўя. Дагэтуль адказу на хадайніцтва няма, паведаміла адвакат Шаханцова. Пры гэтым яна адзначыла, што яе падабаронны захоўвае аптымізм, веру ў хуткае вызваленьне і цікавасьць да жыцьця.

“Трымаецца. Хаця з апошніх сілаў, але трымаецца. Выяўляе цікавасьць да ўсяго, да сытуацыі ў краіне, да апошніх падзеяў. Ён чытае “Народную Волю”, якую атрымлівае па падпісцы”, -- паведаміла адвакат.

У менскай калёніі адмаўляюцца камэнтаваць зьвесткі пра пагаршэньне стану здароўя Міхаіла Марыніча.
mmmmm