Міністар адукацыі супраць палітыкі ў ВНУ, але ня супраць БРСМ :: Хартыя'97 :: Навiны

Міністэрства адукацыі падрыхтавала праект указу аб новых правілах прыёму ў вышэйшыя і сярэднія навучальныя ўстановы. Паводле гэтага дакумэнту, дзьве плыні ўступнай кампаніі будуць заставацца толькі ў трох ВНУ краіны: Беларускім дзяржаўным унівэрсытэце, Беларускім нацыянальным тэхнічным і Эканамічным унівэрсытэтах. Па-ранейшаму захоўваюцца льготы для выпускнікоў вясковых школаў і іншых катэгорыяў абітурыентаў. Міністар Аляксандар Радзькоў таксама заявіў пра недапушчальнасьць палітычнай дзейнасьці ў сьценах ВНУ. Але гэтая забарона не распаўсюджваецца на Беларускі рэспубліканскі саюз моладзі, паведаміла “Радыё Свабода”.

Міністар пацьвердзіў правільнасьць рашэньня пра закрыцьцё ў Беларусі Эўрапейскага гуманітарнага ўнівэрсытэту, але ня супраць таго, што цяпер ЭГУ навучае беларускіх студэнтаў у Літве. Распараджэньне пра забарону палітычнай дзейнасьці сярод студэнцкай моладзі Радзькоў пракамэнтаваў гэтак:

“І студэнты і выкладчыкі — яны грамадзяне і маюць права займацца палітыкай. Але мы хочам, каб навучальны працэс заставаўся навучальным працэсам. Гэта значыць, каб лекцыі і аўдыторыі не выкарыстоўваліся для дэклярацыі сваіх поглядаў. Прытрымлівайцеся праграмы і стандартаў, бо вы рыхтуеце спэцыялістаў. Адначасна ёсьць і прафсаюзныя арганізацыі, і БРСМ, у чым зацікаўленыя студэнты, што іх прываблівае, яны працуюць”, -- заявіў міністр.

Пра тое, што выказваньні міністра адукацыі пра свабоду палітычных поглядаў не адпавядаюць рэчаіснасьці, гаворыць намесьнік дырэктара зачыненага ўладамі Нацыянальнага гуманітарнага ліцэю Лявон Баршчэўскі:

“Я думаю, што спадар Радзькоў цудоўна ведае, колькі было выключана студэнтаў, якія дэманстравалі свае погляды — дарэчы, за межамі ВНУ, калі ўдзельнічалі ў пікетах, дэманстрацыях. Што да БРСМ, дык гэта арганізацыя, якую фінансуе дзяржава, ёсьць спосабам утрыманьня студэнтаў. Безумоўна, выказваньні Радзькова няшчырыя, і ён даўно пра сур’ёзныя пытаньні гаварыць ня хоча — пра тое, што катастрафічна падае ўзровень адукацыі і гэта ёсьць вынікам кіраваньня сёньняшняга Міністэрства адукацыі”.

Толькі сёлета на знак пратэсту супраць выключэньня з навучальных установаў за палітычныя погляды група моладзі ў Жодзіне праводзіла галадоўку. З чацьвертага курсу была адлічаная студэнтка факультэту журналістыкі БДУ Вольга Класкоўская, якая супрацоўнічала з газэтай “Народная Воля”. Таксама цярпелі перасьлед студэнты, якія яе падтрымлівалі. Раней быў выключаны з Баранавіцкага тэхнікуму актывіст руху “Зубр” Мікіта Сасім.