Чаму служба бясьпекі «Velcom» блякуе тэлефоны апазыцыянэраў? :: Хартыя'97 :: Навiны

Служба бясьпекі мабільнай лічбавай сувязі “Velcom” заблякавала тэлефон супрацоўніцы прэсавай службы “Хартыі’97” Натальлі Радзінай. Гэта адбылося за дзень да правядзеньня акцыі салідарнасьці з ахвярамі палітычных рэпрэсіяў. Палітыкі адзначаюць, што гэта ня першы выпадак, калі тэлефоны палітычных актывістаў блякуюцца ў часе акцыяў апазыцыі.

Натальля Радзіна тры гады карыстаецца паслугамі сотавага апэратара “Velcom”. 14 кастрычніка яна дасылала паведамленьні аб акцыі салідарнасьці абанэнтам, якія былі ў нататніку мабільнага тэлефона. 15 кастрычніка тэлефон перастаў працаваць. Высьветлілася, што служба бясьпекі кампаніі дала загад заблякаваць SIM-картку.

“SMS-паведамленьні былі вельмі простага зьместу. Там папросту нагадвалася, што 16 кастрычніка пройдзе акцыя салідарнасьці. Трэба папросту выключыць сьвятло і запаліць сьвечку. Патэлефанавала ў “Velcome”, і мне там паведамілі, што мая SIM-картка заблякаваная, згодна з распараджэньнем службы бясьпекі кампаніі. Гэта абуральная сытуацыя, бо грошы былі ўнесены своечасова і былі на рахунку. Гэтая сытуацыя паўтараецца ў дні выбараў, рэфэрэндумаў, акцыяў пратэсту. Як правіла, SIM-карткі блякуюць лідэрам апазыцыі, журналістам, людзям, якім патрэбная сувязь у гэтыя дні, як ніколі”, -- паведаміла журналіст.

Натальля Радзіна вырашыла, што зьвяртацца ў суд бессэнсоўна. Яна ўпэўнена, што не даб’ецца кампэнсацыі альбо таго, каб сытуацыя, калі ёй заблякуюць тэлефон, не паўтарылася.

Палітвязень, лідар Беларускай сацыял-дэмакратычнай партыі (Народная Грамада) Мікола Статкевіч не аднойчы сутыкаўся з тым, што ў самы патрэбны момант яго тэлефон пераставаў працаваць. Ён паведаміў Радыё Свабода, што амаль заўсёды ў часе буйных апазыцыйных акцыяў некаторым актывістам апазыцыі блякуюць тэлефоны.

“На жаль, гэта зьяўляецца дастаткова распаўсюджанай практыкай. Гэта сьведчыць аб тым, што кампаніі мабільнай сувязі не зьяўляюцца самастойнымі і незалежнымі, а кантралююцца ўладамі і спэцслужбамі. Такая гісторыя была ў часе прэзыдэнцкіх выбараў 2001 году ў дзень галасаваньня на выбарчых участках, каб людзі не маглі паведамляць пра парушэньні. У нармальнай краіне можна было б праз суд спагнаць з кампаніяў за такія рэчы вялікія грашовыя кампэнсацыі. Але ў нас і суд незалежным не зьяўляецца. Унікальны беларускі досьвед”, -- кажа Статкевіч.

У кампаніі “Velcom” паведамілі Радыё Свабода, што тэлефон Натальлі Радзінай адключылі нібыта з тэхнічнай прычыны. Яны спаслаліся на тое, што яна даволі інтэнсіўна дасылала SMS-паведамленьні, і гэта нібыта стварыла праблемы для астатніх абанэнтаў. Апроч таго, тэлефон зарэгістраваны на іншае прозьвішча, што ёсьць парушэньнем дамовы.

Адметна, што такі адказ служба бясьпекі кампаніі падрыхтавала толькі ў другой палове дня 17 кастрычніка.