КГБ узмацняе ціск на гарадзенскіх апазыцыянэраў :: Хартыя'97 :: Навiны

Камандзе адзінага кандыдата ў прэзідэнты ад дэмакратычных сілаў Беларусі Аляксандра Мілінкевіча стала вядома, што супрацоўнікі КГБ наведалі вёску Бершты ў Шчучынскім раёне, дзе ён мае дом. Іх цікавілі кантакты адзінага кандыдата на будучых прэзыдэнцкіх выбарах.

Тое, што КГБ цікавіцца асобай адзінага кандыдата на будучых прэзыдэнцкіх выбарах, ня стала вялікай нечаканасьцю для ягонай каманды, бо ў мінулую прэзыдэнцкую кампанію пільную увагу спэцслужбаў прыцягваў Сямён Домаш, штабам якога кіраваў Мілінкевіч.

Прыкметна, што пасьля “навядзеньня парадкаў” у Саюзе палякаў былі адзначаны некалькі кіраўнікоў КГБ — у Горадні і ў Менску. Актывісты Саюзу палякаў перакананыя: супраць іх дзейнічаюць спэцслужбы.

Прадстаўнікі апазыцыі маюць прыклады праслухоўваньня іхніх размоваў. Актывісты, зважаючы на сачэньне, часта адключаюць свае мабільныя тэлефоны, каб нельга было вызначыць іх месцазнаходжаньне.

Праца спэцслужбаў у Горадні робіцца ўсё больш заўважнай. У судзе над журналістамі газэты “Пагоня” Міколам Маркевічам і Паўлам Мажэйкам экспэртам па кампутарнай тэхніцы выступаў супрацоўнік КГБ. Гэтая ж служба летась праводзіла ператрус у кватэры цяперашняга палітвязьня Валерыя Леванеўскага, потым у КГБ дапытвалі паплечніка Леванеўскага Аляксандра Васільева. Тады адбыўся даволі цікавы выпадак: шукаючы месца друку ўлётак, за якія потым пасадзілі Леванеўскага і Васільева, КГБ арыштавала тэхніку ў газэце “День”, якую рэдагаваў Маркевіч.