Аштрафаваныя эвангельскія цэрквы ў Кобрыне і Берасьці :: Хартыя'97 :: Навiны

17 кастрычніка прадстаўнікі Кобрынскага гарвыканкама, супрацоўнікі МНС і санстанцыі Кобрына наведалі шэраг незарэгістраваных эвангельскіх цэркаваў гораду з мэтай выяўленьня парушэньня заканадаўства. У выніку быў складзены пратакол на пастара царквы Хрысьціянаў Веры Эвангельскай горада Кобрына Мікалая Радковіча. Памер штрафу складае 25 тысяч рублей. Штраф быў накладзены з прычыны парушэньня правілаў пажарнай бясьпекі, а менавіта, памер вогнетушыльніка не адпавядаў разьліковым стандартам з улікам памеру памяшканьня.

Сам Мікалай Радковіч так пракамэнтаваў гэтую падзею: “Гэта ўказаньне зьверху зь Берасьця, мэта мне невядомая, але такія камісіі бываюць у нас рэгулярна раз на год”.

Таксама быў складзены пратакол на служыцеля царквы Эвангельскіх Хрысьціян Баптыстаў. Пастар Сьцяпан Канавальчук расцэньвае гэта як “парушэньне Канстытуцыі, якая гарантуе свабоду сумленьня”. Таксама ён распавёў, што за 10 год існаваньня іхняга малітоўнага дому, гэта далёка ня першы штраф, і што кожны раз улады прымушаюць царкву зарэгістравацца.

Вернікі кобрынскіх цэркваў паведамілі, што ў аналягічнай сытуацыі апынулася нерэгістраваная царква Эвангельскіх Хрысьціянаў Баптыстаў у Берасьці.