Прэзідэнт Грузіі запрасіў Аляксандра Мілінкевіча на святкаванне гадавіны Рэвалюцыі Ружаў :: Хартыя'97 :: Навiны

«Для мяне асабіста і для народа Грузіі Ваша прысутнасць сталася б магутным імпульсам надзеі і натхнення. Ваша ахвярная дзейнасць на карысць беларускай дэмакратыі з’яўляецца прыкладам для нас усіх» , - адзначаецца ў афіцыйным запрашэнні, накіраваным на імя адзінага кандыдата ад дэмакратычных сілаў на прэзідэнцкіх выбарах 2006 года Аляксандра Мілінкевіча прэзідэнтам Грузіі Міхаілам Саакашвілі.

“Для грузінскага народа, гадавіна Рэвалюцыі Ружаў – магчымасць яшчэ раз пацвердзіць нашу адданасць дэмакратыі і свабодзе не толькі ў Грузіі, але і ва ўсёй Еўразіі. Мы разумеем, пакуль нашы суседзі не далучацца да дэмакратычнай супольнасці, антыдэмакратычныя ды імперскія захады заўсёды будуць пагражаць дэмакратыі і свабодзе”, - падкрэсліў прэзідэнт Грузіі ў сваім запрашэнні.

Галоўныя ўрачыстасці святкавання гадавіны грузінскай Рэвалюцыі Ружаў адбудуцца 22-23 лістапада ў Тбілісі. У гэтыя ж дні ў сталіцы Грузіі пройдзе міжнародны форум з удзелам шэрагу ўплывовых еўрапейскіх палітыкаў. Прэзідэнт Грузіі прапанаваў Аляксандру Мілінкевічу выступіць на форуме з дакладам.

Даведка: 23 лістапада 2003 года грузінская апазіцыя, якую ўзначаліў Міхаіл Саакашвілі, Ніно Бурджанадзэ і Зураб Жванія, здзейсніла ў Грузіі пакаёвую «рэвалюцыю ружаў». «Узброеныя» ружамі апазіцыянеры вывелі на бестэрміновы мітынг у Тбілісі дзесяткі тысяч грамадзян, незадаволеных бяспраўем улады. Тагачасны прэзідэнт краіны Эдуард Шэварнадзэ не асмеліўся ўжыць зброю супраць дэманстрантаў і падаў ў адстаўку.