Палітвязня Валеры Леванеўскага везлі ў шпіталь тры дні :: Хартыя'97 :: Навiны

Тры дні заняло падарожжа вязьня івацэвіцкай калёніі, лідара страйкаму прадпрымальнікаў Валера Леванеўскага з Івацэвіч ў менскі турэмны шпіталь, куды яго паклалі на абсьледаваньне і лячэньне. Пасьля некалькіх галадовак пратэсту Валер Леванеўскі адчуў боль у сэрцы і сьпіне, і адміністрацыя Івацэвіцкай калёніі, дзе ён адбывае пакараньне, пагадзілася на ягоную шпіталізацыю. Між тым ніякіх, паслабленьняў у рэжыме транспарціроўкі хвораму Леванеўскаму дадзена не было. “З Івацэвіч у Менск яго павезьлі 15-га кастрычніка, а ліст ён напісаў 18-га, што прыехаў дзьве гадзіны таму і толькі-толькі ўладкаваўся. Такім чынам, дарога з Івацэвіч ў Менск заняла тры дні”, – падлічыў сын вязьня Ўладзімер Леванеўскі.

“Знаходзіцца ён ў нэўралягічным аддзяленьні, у 5-й палаце. Як ён піша, курс лячэньня зойме прыкладна месяц, але калі знойдуць нешта больш цяжкае, то і болей”, -- паведаміў Уладзімер Леванеўскі “Радыё Свабода”.

У адміністрацыі менскай калёніі, на тэрыторыі якой знаходзіцца Рэспубліканскі турэмны шпіталь, не камэнтуюць стан здароўя Валера Леванеўскага.

Нагадаем, сёлета тут лячыліся Міхаіл Марыніч і Аляксандр Васільеў, якія, як Леванеўскі прызнаныя палітычнымі вязьнямі.

Лідар страйкаму прадпрымальнікаў, сябра “Свабоднай Беларусі” Валер Леванеўскі будзе знаходзіцца за кратамі яшчэ болей за паўгода. Яго пакаралі двума гадамі турмы за паклёп на Лукашэнку. Суд убачыў паклёп на прэзыдэнта ва ўлётцы, якую распаўсюдзіў Валер Леванеўскі напярэдадні мітынгу прадпрымальнікаў. “Прыйдзі і скажы, што ты супраць таго, каб нехта за твой кошт езьдзіў адпачываць у Аўстрыю, катацца на лыжах, жыць у сваё задавальненьне”, – было напісана ў гэтай улётцы.
lllll