Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Беларуская прапаганда ахопіць і замежжа? 10:10, 26/10/2005
Сёньня ў Магілёве другі дзень сэмінару ў пытаньнях інфармацыйнай і прапагандысцкай працы за мяжой. Як паведамляюць мясцовыя афіцыйныя СМІ, у першы дзень сэмінару адзначалася, што Беларусь павінна мець наступальную і агрэсіўную інфармацыйную палітыку. Каардынаваць жа гэтую прапагандысцкую працу павінна Міністэрства замежных спраў.
Нэгатыўны вобраз нашай краіны, які штучна ствараецца ў СМІ на Захадзе, – гэта ня больш, чым фарс, казалі ўдзельнікі сэмінару для прэс-сакратароў і кіраўнікоў міжнародных аддзелаў у пытаньнях арганізацыі інфармацыйнай і прапагандысцкай працы за мяжой. Беларусь – самадастатковая краіна, якая заслугоўвае, каб аб ёй ведалі аб’ектыўную інфармацыю. Сёньня галоўнае кансалідаваць намаганьні адпаведных структураў у гэтым накірунку, гаварылася на сэмінары.
“Трэба каб усе рэспубліканскія структуры ў гэтай важнай прапагандысцкай і інфармацыйнай працы за мяжой працавалі разам, праз агульны каардынуючы цэнтар – МЗС”, – заявіў у Магілёве намесьнік міністра замежных спраў Аляксандар Герасіменка.
Улады зьбіраюцца праводзіць прапагандысцкую працу ў іншых краінах пры дапамозе тэлебачаньня, радыё і інтэрнэту, паведамляе сайт zubr-mogilev.org
“Сёньня трэба паказваць Беларусь комплексна, актыўна выкарыстоўваючы спадарожнікавы тэлеканал “Беларусь-ТБ”, радыёстанцыю “Беларусь”, інтэрнэт-сайты і іншыя тэхнічныя і арганізацыйныя магчымасьці”, – сказаў А.Герасіменка.
