Марэк Юрэк абраны маршалкам Сейма Польшчы :: Хартыя'97 :: Навiны

Большасцю галасоў дэпутаты польскага сейма апошняга склікання абралі на пасаду маршалка Сейма палітыка партыі “Права і справядлівасць” Марэка Юрэка. Кандадат на гэтую пасаду ад партыі “Грамадзянская платформа” Браніслаў Камароўскі заявіў, што гэтае абранне будзе азначаць канец перамоваў у стварэнні ўрадавай кааліцыі паміж “Грамадзянскай платфомай” і “Правам і справядлівасцю”.

Галоўнай перашкодай у стварэнні ўрадавай кааліцыі дзвюх вядучых правых палітычных партый, якія прадстаўляюць дэпутацкую большасць у Сейме, з’яўлялася пытанне адносна кандыдатуры на пасаду міністра ўнутраных спраў і адміністрацыі. Як неаднаразова заяўляў вядучым польскім мас-медыям лідэр “Грамадзянскай платформы” Дональд Туск, які прайграў прэзідэнцкія выбары, ягоная партыя жадала б бачыць на гэтай пасадзе кандыдата на віцэ-прэм’ера Яна Ракіту. Але палітыкі з партыі “Права і справядлівасць” катэгарычна з гэтым не пагаджаліся. У сваю чаргу абраны прэзідэнт-элект Лех Качынскі заяўляў, што хацеў бы бачыць у крэсле маршалка Сейма Дональда Туска. Але Туск не пагадзіўся, прапанаваўшы кандыдатуру былога міністра абароны Браніслава Камароўскага.

У інтэрв’ю вядучым польскім СМІ шэф парламенцкага клуба “Права і справядлівасць” ахарактарызаваў наступным чынам Марэка Юрэка:

– Гэта палітык, які заўсёды меў цвёрдую пазіцыю ў спрэчках, але ён адначасова канкрэтны і метадычны, з павагай ставіцца да апанента, нават тады калі з ім і не пагаджаецца…

Марэк Юрэк пачаў сваю палітычную кар’еру як дэпутат польскага Сейма ў 1989-1993 гадах, у 1995-2001 з’яўсяўся сябрам “Дзяржаўнай рады радыёфоніі і тэлевізіі”, пасля быў віцэстаршынём Камісісіі па замежных справах польскага Сейму IV склікання.