Андрэй Саньнікаў: Патрэбная каардынацыя пазыцыі па Беларусі :: Хартыя'97 :: Навiны

Падчас сустрэчы з прадстаўнікамі Рады Эўропы і Эўразьвязу ў Страсбурзе лідэры беларускай апазыцыі прапанавалі аднавіць працу парлямэнцкай “тройкі” па Беларусі — супольнай дэлегацыі Парлямэнцкай асамблеі Рады Эўропы, АБСЭ і Эўрапарлямэнту.

Парлямэнцкая “тройка” ў канцы 90-х гадоў рэгулярна наведвала Беларусь і спрабавала наладзіць дыялёг улады і апазыцыі. Менавіта парлямэнцкая “тройка” вылучыла рэкамэндацыі наконт дэмакратызацыі сытуацыі ў Беларусі. Беларускія ўлады рэкамэндацыі не выканалі. Пасьля выбараў прэзыдэнта 2001 года гэты міжнародны працоўны орган спыніў сваё існаваньне. Цяпер кіраўнік Нацыянальнага выканаўчага камітэту Анатоль Лябедзька і намесьнік кіраўніка перадвыбарчага штабу адзінага кандыдата ад апазыцыі Вінцук Вячорка выступілі зь ініцыятываю аднавіць функцыянаваньне тройкі з мэтаю выпрацоўкі супольнай пазыцыі трох парлямэнцкіх арганізацыяў па Беларусі.

Як паведамляе Польскае радыё, міжнародны каардынатар грамадзянскай ініцыятывы Хартыя’97 Андрэй Саньнікаў, які папярэднюю працу парлямэнцкай “тройкі” па Беларусі ня лічыць эфэктыўнай, згодны, што каардынацыя пазыцыі міжнародных парлямэнцкіх структур па Беларусі патрэбная.

Ідэю аднаўленьня парлямэнцкай “тройкі” падтрымаў былы кіраўнік гэтага органу Адрыян Севярын, а таксама намесьнік кіраўніка дэлегацыі Эўрапарлямэнту па сувязях зь Беларусьсю Альдзіс Кушкіс.