На Кубе хваляць палітыку Беларусі :: Хартыя'97 :: Навiны

Цэнтральная кубінская газэта Granma піша пра Беларусь як пра сьмелую эўрапейскую краіну, якая адкрыта і рашуча выступае за адмену амэрыканскіх санкцыяў супраць Кубы. Выданьне знаёміць чытачоў з афіцыйным лістом, які Беларусь як сябра Арганізацыі Аб’яднаных Нацыяў накіравала на адрас Генэральнага сакратара ААН, паведамляе “Радыё Свабода”.

У гэтым пасланьні ўтрымліваецца пратэст супраць эканамічнай, гандлёвай і фінансавай блякады ў дачыненьні да Кубы. Газэта Granma паведамляе, што разам зь Беларусьсю свае лісты ў падтрымку “вострава свабоды” таксама накіравалі Лібія, Намібія, Іран, Паўночная Карэя, Сірыя, Буркіна Фасо, Зімбабве ды іншыя краіны. Галасаваньне па кубінскім пытаньні ў ААН павінна адбыцца на будучым тыдні, 8 лістапада.

Як вынікае зь беларускага пасланьня, якое шырока цытуецца ў кубінскім друку, “адмена санкцыяў магла б стаць перадумовай для будучай нармалізацыі міжнародных дачыненьняў паміж ЗША і Кубай”, бо “усе аднабаковыя спробы зьмяніць унутраную палітыку іншых дзяржаваў праз ваенныя, палітычныя, эканамічныя і іншыя прымусовыя захады недапушчальныя” У беларускім пасланьні да Генэральнага сакратара ААН падкрэсьліваецца, што захады амэрыканскага ўраду на ўмацаваньне блякады супраць Кубы з’яўляюцца небясьпечным крокам як для рэгіёну,так і для ўсяго сьвету ў цэлым”, піша кубінская Granma.

Напярэдадні ў Менску ў часе сустрэчы Аляксандра Лукашэнкі з новым кубінскім амбасадарам Амарам Сэнонам Кінтэрам, беларускі кіраўнік заявіў пра свае самыя цёплыя сымпатыі што да кубінскага народу, кіраўніцтва краіны і асабіста да Фідэля Кастра і жаданьне падтрымліваць вонкавую палітыку Кубы.