«Зубр» у падтрымку «Народнай волі» :: Хартыя'97 :: Навiны

Магілёўская моладзь учора ўвечары правела акцыю у падтрымку незалежнай газэты “Народная воля”. Некалькі дзясяткаў актывістаў руху «Зубр» ды іншых дэмакратычных моладзевых арганізацый у вызначаны час прыйшлі на прыпынак грамадзкага транспарту насупраць будынку Магілёўскага гарвыканкаму з нумарамі “Народнай волі”. Тут яны разгарнулі газэты і пачалі іх чытаць.

Акцыя салідарнасьці з адзінай штодзённай беларускай незалежнай газэтай “Народная воля” не абышлася без міліцыянтаў, якія, аднак, не перашкаджалі яе ўдзельнікам. Флэш-моб прыцягнуў увагу мінакоў - людзі прасілі даць ім асобнікі газэты, зь якой “Белсаюздрук” напрыканцы верасьня скасаваў у аднабаковым парадку дамову на распаўсюд праз свае шапікі.

Улады рознымі спосабамі імкнуцца ліквідаваць крыніцы альтэрнатыўнай інфармацыі. З “Народнай воляй” адмаўляюцца заключаць дамовы беларускія друкарні, газэта вымушана выдавацца ў Смаленску. Да сваіх чытачоў газэта цяпер даходзіць толькі праз падпіску і грамадзкіх распаўсюднікаў.