Беларускія актывісты будуць пратэставаць у Страсбуры :: Хартыя'97 :: Навiны

Беларускія палітычныя ўцекачы, што галадалі ў цэнтры Брусэлю, насупраць штаб-кватэраў вядучых эўрапейскіх структураў, вырашылі спыніць галадоўку і пераехаць у Страсбур, каб у бліжэйшы панядзелак распачаць там новую акцыю.

Пасьля трох дзён галадоўкі, беларусы вырашылі спыніць акцыю – зрабіць гэта іх папрасілі прадстаўнікі бэльгійскіх службаў бясьпекі, на дадатак аднаму з галадоўнікаў стала дрэнна.

Тым ня менш, галадоўнікі лічаць, што дасягнулі сваіх мэтаў.

“Сёння ў Бэльгіі нацыянальнае сьвята – дзень сканчэньня Першай сусьветнай вайны. Будзе фэст, а мы якраз стаім на цэнтральным праспэкце, дзе адбудзецца парад. Таму нас папрасілі адыйсьці. А па-другое, адна з галоўных мэта галадоўкі – каб прадстаўнікі Эўрапарлямэнту і іншых структураў Эўразьвязу даведаліся пра палітзьняволеных, выкананая”, -- паведаміў “Радыё Свабода” Ігар Лазарчук зь Беларуска-эўрапейскага задзіночаньня.

Працягваць дамагацца выкананьня іншых мэтаў галадоўкі – стварэньня міжнароднай камісіі для расьсьледаваньня справаў зьніклых палітыкаў, а таксама вызваленьня палітзьняволеных у Беларусі, беларускія эмігранты маюць намер у Страсбуры, дзе на наступным тыдні пачынаецца сэсія Эўрапейскага парлямэнту.

Зрабіць такі крок бэльгійскіх калегаў пераканалі беларускія палітычныя імігранты, што жывуць цяпер у Францыі – яны прыехалі ў Брусэль, каб падтрымаць галадоўнікаў.

“Эўрапарлямэнтары будуць цяпер засядаць у Страсбуры, і таму няма сэнсу галадаваць тут, у Брусэлі. Менавіта таму, каб зрабіць акцыю больш плённай, мы вырашылі перанесьці яе ў Страсбур”, -- гаворыць адзін зь іх Павал Сівук.

Як дакладна будзе выглядаць акцыя ў Страсбуры, пакуль невядома.