Аляксандр Мілінкевіч сустракаеца з народам :: Хартыя'97 :: Навiны

«Новая беларуская ўлада ніколі не дапусціць прыніжэння прадпрымальнікаў», – заявіў Аляксандр Мілінкевіч у пятніцу падчас наведвання гарадcкога рынку ў Баранавічах. У размове з мясцовымі прадпрымальнікамі адзіны прэтэндэнт на пасаду прэзідэнта Беларусі ад дэмакратычных сілаў падкрэсліў, што спрыяць развіццю бізнэсу ў краіне – адзін з найважнейшых пунктаў ягонай палітычнай праграмы.

Баранавічы – першы беларускі горад, з якога пачалася інфармацыйна-агітацыйная кампанія падтрымкі Аляксандра Мілінкевіча як адзінага прэтэндэнта ад аб’яднаных дэмакратычных сілаў. Ён меў наведаць гарадскі рынак, а таксама сустрэцца са студэнтамі баранавіцкіх навучальных установаў, працаўнікамі завода аўтаматычных ліній і мясцовай інтэлігенцыяй. У Баранавічах Аляксандар Мілінкевіч сустрэўся з палітычным зьняволеным Міколам Статкевічам, які адбывае пакаранне ў мясцовай папраўчай установе адкрытага тыпу, – паведамляе прэс-служба Партыі БНФ.

Візіт ў Баранавічы Аляксандр Мілінкевіч распачаў наведваннем Свята-Пакроўскага праваслаўнага сабору, дзе запаліў свечку за дабрабыт беларускага народу. Адзіны прэтэндэнт сустрэўся таксама з прадстаўнікамі іншых хрысціянскіх канфесіяў горада.

Па запрашэнні мясцовых прадпрымальнікаў Аляксандр Мілінкевіч наведаў гарадскі рынак, дзе адказаў на пытанні гандляроў і пакупнікоў. Пазіцыя Аляксандра Мілінкевіча ў пытаннях падтрымкі малога і сярэдняга бізнэсу, стварэння неабходных умоваў для яго эфектыўнага развіцця і ліквідацыі бюракратычных перашкодаў знайшла падтрымку ў баранавіцкіх прадпрымальнікаў. “Малы і сярэдні бізнэс павінен стаць маторам эканамічнага развіцця будучай Беларусі”, – заявіў Аляксандр Мілінкевіч.

Найбольш цёплай была сустрэча Аляксандра Мілінкевіча са студэнтамі Баранавіцкага дзяржаўнага унівэрсітэта і Недзяржаўнага эканоміка-юрыдычнага коледжа. Маладыя людзі адзначылі тры найвастрэйшыя праблемы, якія хвалююць сёння беларускае студэнцтва: высокая плата за навучанне, прымусовае размеркаванне і дрэнныя ўмовы ў студэнцкіх інтэрнатах. Адказваючы на пытанні студэнтаў, Аляксандр Мілінкевіч падкрэсліў, што мае досвед вырашэння падобных праблемаў, бо амаль 25 год выкладаў у розных беларускіх і замежных вышэйшых навучальных установах. “Мая палітычная праграма пабудаваная на неабходнасці пераменаў у Беларусі, і менавіта моладзь патрабуе сёння гэтых пераменаў”, – заявіў Аляксандр Мілінкевіч. У сустрэчы актыўна ўдзельнічала начальнік ідэалагічнага аддзела Баранавіцкага гарвыканкама Таццяна Жытко.

Увечары адзіны прэтэндэнт на пасаду прэзідэнта Беларусі ад аб’яднаных дэмакратычных сілаў сустрэўся з супрацоўнікамі завода аўтаматычных лініяў, а таксама ўзяў удзел у гарачай тэлефоннай лініі папулярнай баранавіцкай газеты “INTEX-PRESS”.