«Мы будзем дзейнiчаць па прынцыпе савецкiх дысiдэнтаў...» :: Хартыя'97 :: Навiны

Рэдактар i выдавец недзяржаўнай газеты “Згода” Аляксей Кароль аплацiў штраф, прызначаны судом Партызанскага раёна Мiнска. Як раней паведамляў БелаПАН, 23 верасня А.Кароль i яго намеснiк Аляксандр Здвiжкоў былi аштрафаваны на 100 базавых велiчынь (прыкладна 1200 долараў ЗША) кожны за распаўсюджванне ў СМI заведама непраўдзiвых звестак. Менавiта так квалiфiкаваў суд надрукаваныя ў газеце “Згода” фотакалажы — сюжэты класiчных жывапiсных палотнаў, куды змешчаны выявы вядомых палiтыкаў.

10 лiстапада А.Кароль атрымаў ад судовага выканаўца Савецкага раённага суда Мiнска пiсьмовую прапанову добраахвотна да 15 лiстапада аплацiць штраф у памеры 2 млн. 550 тыс. рублёў. У адваротным выпадку, паведамлялася ў лiсце, суму будуць спаганяць прымусова.

“Мы доўга думалi i абмяркоўвалi, цi выплачваць штраф, паколькi мы абскардзiлi гэты прыгавор у Мiнскiм гарадскiм судзе, аднак скарга яшчэ не разгледжана. У вынiку мы прыйшлi да высновы, што нявыплата штрафу службовымi асобамi газеты прывядзе да арышту рахунку выдання i, адпаведна, спынення выхаду газеты. Гэта значыць, улада даб`ецца таго, чаго яна мела намер дабiцца. Мы такога шанцу не далi”, — сказаў А.Кароль у iнтэрв`ю БелаПАН.

Паводле слоў рэдактара, калi гарадскi суд вырашыць, што штрафы былi накладзены незаконна, яны будуць патрабаваць вяртання выплачанай сумы.

“Акрамя таго, мы падрыхтавалi скаргу ў Вышэйшы Гаспадарчы суд на папярэджанне Мiнiстэрства iнфармацыi, вынесенае нам 9 лiстапада. Дзiўна, што папярэджанне аб распаўсюджваннi заведама непраўдзiвых звестак павiнна абскарджвацца ў ВГС, але, мабыць, такая сiстэма. Абскарджанне дазволiць нам яшчэ раз запатрабаваць вынiкi экспертызы газеты i паказаць, як i за што ў нас выносяцца папярэджаннi газетам. Мы будзем дзейнiчаць па прынцыпе савецкiх дысiдэнтаў i патрабаваць ад улады выконваць свае законы”, — сказаў А.Кароль.