Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
На тыдні ў рэдакцыях некалькіх рэгіянальных выданняў мясцовыя падраздзяленні РУП «Белпошта» правялі праверку «ўмоваў выканання ліцэнзіі на ажыццяўленне падпіскі». Па інфармацыі ГА «Беларуская асацыяцыя журналістаў», інспекцыі закранулі, у прыватнасці, газеты “Intex-press”, “Газета Слонимская” і «Брестский курьер». Юрысты БАЖ не выключаюць, што гэткія дзеянні могуць мець на мэце пазбаўленне рэдакцый ліцэнзіі на правядзенне падпіскі.
Паўнамоцтвы на правядзенне праверкі аддзяленні «Белпошты» атрымалі ад Міністэрства сувязі і інфарматызацыі. Пра гэта, у прыватнасці, гаварылася ў суправаджальнай паперы, якую прад`явілі прадстаўнікі Брэсцкага філіяла РУП «Белпошта» пры праверцы рэдакцыі “Intex-press”.
Між тым, юрысты Цэнтру абароны СМІ пры БАЖ падкрэсліваюць, што, паводле беларускага заканадаўства, кантроль за выкарыстаннем ліцэнзіі павінен ажыццяўляць альбо орган, які яе выдаў, альбо іншы дзяржаўны орган. Згодна з Грамадзянскім кодэксам, РУП «Белпошта»– гэта камерцыйная арганізацыя, і Мінсувязі, у адпаведнасці заканадаўствам, не мела права дэлегаваць ёй свае паўнамоцтвы, - падкрэсліваюць юрысты БАЖ. Яны звязваюць гэтыя праверкі з кампаніяй па выключэнні незалежных выданняў з падпісных каталогаў.
