У Вашынгтоне камэнтуюць папраўкі Лукашэнкі :: Хартыя'97 :: Навiны

Дырэктар Інстытуту ў падтрымку дэмакратыі ва Ўсходняй Эўропе Эрык Чэнавэт лічыць, што прапанаваныя Лукашэнкам папраўкі да Крымінальнага кодэксу Беларусі ў першую чаргу патрэбныя рэжыму для кантролю апазыцыі і выбараў. Паводле спадара Чэнавэта, многім рэжымам характэрна перабольшваньне сваёй папулярнасьці і сілы. Лукашэнка ў гэтым сэнсе ацэньвае сытуацыю больш цьвяроза. Ён бачыць сапраўдныя межы сваёй папулярнасьці й разумее праблемы сваёй рэальнай легітымнасьці.

“Лукашэнку ўсё яшчэ патрэбная легітымнасьць. Гэтую легітымнасьць ён здабывае праз па-майстэрску кантраляваныя выбары. Таму ён дагэтуль не адмовіўся ад працэдуры выбараў. З гэтай самай прычыны ён не арыштаваў у адначасьсе ўсіх лідэраў апазыцыі, а абмяжоўваецца пераважна перасьледам актывістаў. Яго мэта – кантраляваць апазыцыю і яе рост, а ня цалкам яе пазбавіцца”, -- лічыць экспэрт.

Таму гэтыя папраўкі, на думку Чэнавета, будуць выкарыстоўвацца, як мэханізм кантролю дзейнасьці апазыцыі, а не мэханізм чыстай дыктатуры.

“Беларусь пакуль не пераўтварылася ў Кубу. І гэта дае апазыцыі нейкі шанец для манэўраў. Але тэндэнцыя палітычнага адкату ў савецкі час відавочная”, -- кажа Чэнавэт.

Паводле яго, Захад спазьняецца ў фармулёўцы ўзгодненай моцнай і празрыстай палітыкі ў дачыненьні да рэжыму:

“ЗША і Эўразьвяз ясна выказаліся ў падтрымку дэмакратычнай апазыцыі. Аднак яны дагэтуль не сфармулявалі палітыкі, якая б мела рэальныя наступствы для Беларусі і Расеі за невыкананьне дэмакратычнай працэдуры выбараў”.