Сьледзтва па справе Аўтуховіча працягнутае яшчэ на месяц :: Хартыя'97 :: Навiны

30 лістапада ў Горадні было працягнутае яшчэ на месяц сьледзтва па крымінальнай справе супраць ваўкавыскага прадпрымальніка Мікалая Аўтуховіча. У гэты ж дзень адбыўся новы разгляд справы аб штрафных санкцыях супраць яго у Вышэйшым гаспадарчым судзе ў Менску. Мікалай Аўтуховіч працягвае галадаць за кратамі 48-ы дзень, але яму ставяць кропельніцы.

Як паведаміў “Радыё Свабода” прадстаўнік арыштаванага прадпрымальніка ў судзе Андрэй Кухцюк, пазоў Мікалая Аўтуховіча з просьбай прызнаць несапраўдным рашэньне абласной падатковай інспэкцыі адносна яго — адхілілі. Паводле Вышэйшага гаспадарчага суду, Аўтуховіч ў 2003 годзе парушыў парадак грашовых разьлікаў, таму эканамічныя санкцыі да яго ўжыты абгрунтавана. Падатковая служба выставіла яму тады штраф — 267 мільёнаў рублёў.

Што датычыць цяперашняй крымінальнай справы, адвакат Галіна Іванова патлумачыла, што перш за ўсё не гатовая эканамічна экспэртыза па справе Аўтуховіча, таму сьледзтва працягнецца да канца году.

Паўтары месяцы таму супраць Аўтуховіча распачала крымінальную справу упраўленьне фінансавых расьсьледаваньняў, яго арыштавалі 14 кастрычніка ў Горадні. Прадпрымальніка абвінавачваюць ва ухіленьні ад выплаты падаткаў, што пацягнула страты для бюджэту ў асабліва буйным памеры. Яму налічылі недаплачаных падаткаў — 679 мільёнаў рублёў. Крымінальная справа супраць прадпрымальніка датычыць другой часткі артыкула 243, якім прадугледжана пакараньне — ад трох да сямі гадоў зьняволеньня. Суд можа пры гэтым таксама канфіскаваць маёмасьць.