Міліцыянты ня ўбачылі вандалізму ў Курапатах :: Хартыя'97 :: Навiны

Супрацоўнікі міліцыі не знайшлі прыкметаў вандалізму ва ўрочышчы Курапаты, акрамя "падзеньня верхняй часткі лавы Клінтана". Пра гэта агенцтву "Інтэрфакс" паведамілі у РАУС Менскага раёну. Супрацоўнікі РАУС мяркуюць, што “падзеньне пліты з лавы магло адбыцца і без чалавечага удзелу. У сувязі з рэзкімі зьменамі надвор’я яна магла сама ўпасьці”, – кажуць міліцыянты.

Паводле супрацоўнікаў міліцыі, цяпер высьвятляецца, хто і зь якімі матывамі пашкодзіў мэмарыяльны знак “Ад народу ЗША народу Беларусі”, усталяваны ў Курапатах. У РАУС Менскага раёна паведамілі, што “калі агляд месца здарэньня выявіць, што мела месца парушэньне зламыснае дзеяньне, то будзе разглядацца пытаньне аб пачатку крымінальнай справы”.

Нагадаем, што невядомыя вандалы зноў разьбілі мэмарыяльны знак “Ад народу ЗША народу Беларусі дзеля памяці”, гэтак званую лаву Клінтана. Ва ўрочышчы зламана каля дзесяці крыжоў, пашкоджаны і абраз Маці Божай Курапацкай. У міліцыі Менскага раёну “Радыё Свабода” паведамілі, што сёлета ў лістападзе яны зьнялі патруляваньне Курапатаў з-за недахопу службоўцаў.

Гэта ня першы выпадак вандалізму ў дачыненьні да лавы Клінтана. Яна была пашкоджаная ўлетку 2001 году, у студзені 2002 адноўлены мэмарыяльны знак урачыста адкрываў тагачасны амбасадар ЗША ў Беларусі Майкл Козак. Улетку 2003 году лаву Клінтана зноў пашкодзілі, тады амэрыканская амбасада зрабіла заяву, што калі беларускія ўлады ня здольныя забясьпечыць аховы мэмарыяльнага знаку, яе можна перанесьці на тэрыторыю амбасады. Дагэтуль ніхто зь вінаватых у вандалізьме ў Курапатах ня быў знойдзены і пакараны.

фота svaboda.org