Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Амбасадары краінаў Эўразьвязу наведалі Курапаты 12:19, 02/12/2005
Амбасадары краінаў Эўразьвязу, акрэдытаваныя ў Беларусі, 1 снежня наведалі ўрочышча Курапаты, каб на свае вочы пабачыць сьляды вандалізму.
“Мы чулі пра тое, што тут пабывалі вандалы і разбурылі крыжы і амэрыканскую лаву. Мы падумалі, што лепш прыйсьці і пабачыць гэта на свае вочы, і мы былі шакаваныя, што людзі так могуць рабіць. Мы хочам таксама выказаць сваю павагу і ўшанаваць памяць ахвяраў рэпрэсіяў. І мы з задавальненьнем заўважылі, што тое, што было разбурана, ужо адноўлена. Мы спадзяемся, што ўлады зробяць усё магчымае, каб усё аднавіць да першапачатковага выгляду і абараняць гэта”, -- паведаміў “Радыё Свабода” амбасадар Вялікабрытаніі Браян Бэнэт.
Амбасадар Францыі Стэфан Шмялеўскі згадаў, як некалькі гадоў таму ён пры гэткіх жа абставінах наведваў мэмарыял ахвярам галакосту “Яма”, які таксама апаганілі вандалы:
“Ва ўсіх краінах Эўропы паважаюць ахвяраў. Трэба такую павагу захоўваць. Гэта пытаньне культуры і цывілізацыі”, -- сказаў Стэфан Шмялеўскі.
“Страшнае месца, якое трэба памятаць, і не дапускаць такіх актаў вандалізму, якія тут адбыліся. А калі яны адбываюцца, то трэба паказваць сваю пазыцыю і аднаўляць”, -- упэўнены амбасадар Літвы ў Беларусі Пятрас Вайцякунас.
“Я ў шоку, што такі вандалізм тут існуе. Паколькі я амбасадар Нямеччыны, то гэта мяне асабліва тычыцца, паколькі многія з забітых ад 1939 да 1941 году загінулі тут у выніку пакту Гітлера і Сталіна. Курапацкі мэмарыял — гэта таксама нагода ўспомніць пра хаўрус, які заключылі самыя жахлівыя дыктатары 20 стагодзьдзя”, -- заявіў нямецкі амбасадар Марцін Хэкер.
