Намесьнік старшыні ПАРЭ крытыкуе палітычныя папраўкі ў Крымінальны кодэкс :: Хартыя'97 :: Навiны

Папраўкі ў беларускае заканадаўства, ухваленыя напярэдадні "саветам рэспублікі", скрытыкаваў намесьнік старшыні Парлямэнцкай Асамблеі Рады Эўропы Тадэвуш Івіньскі. Ён сказаў Радыё Свабода: “Такія папраўкі трэба ацэньваць адназначна крытычна, бо гэта спроба заблякаваць тыя крыніцы незалежнай інфармацыі ў Беларусі і зь Беларусі, якія пакуль яшчэ ёсьць. Як намесьнік старшыні ПАРЭ, я павінен адзначыць, што летась Асамблея ўхваліла справаздачу ў справе сытуацыі ў Беларусі, дзе гаворыцца аб тым, што дэмакратыя, свабода слова асабліва ў гэтай краіне знаходзіцца пад пагрозай. Ад таго часу, на жаль, нічога не зьмянілася ў лепшы бок. Гэтыя папраўкі, напэўна, зьвязаныя з прэзыдэнцкімі выбарамі, што адбудуцца ў наступным годзе. Гэта спроба заблякаваць усё”.

"Савет Рэспублікі" зацьвердзіў папраўкі да Крымінальнага і Крымінальна-працэсуальнага кодэксаў учора. “За” выказаліся ўсе 47 сэнатараў, галасоў “супраць” не было. На мінулым тыдні гэтыя папраўкі, унесеныя Лукашэнкам, ухваліла "палата прадстаўнікоў". Законапраект яшчэ мае падпісаць кіраўнік дзяржавы.

Папраўкі, сярод іншага, прадугледжваюць крымінальную адказнасьць за “дэстабілізацыю сытуацыі” і дыскрэдытацыю краіны і яе ўладаў, перадачу заведама непраўдзівых зьвестак аб сытуацыі ў Беларусі замежным і міжнародным арганізацыям. За гэта чакае пакараньне ад штрафу і шасьцімесячнага арышту да пазбаўленьня волі тэрмінам да пяці гадоў.