Рэдактару часопісу «Magazyn Polski» вярнулі пашпарт :: Хартыя'97 :: Навiны

У Ленінскім АВІРы ў Горадні галоўнаму рэдактару часопіса «Magazyn Polski» Андрэю Пачобуту вярнулі пашпарт, у якім стаіць гербавая пячатка з надпісам ад рукі “часова абмежаваны выезд за мяжу” і подпісам начальніка абласнога АВІРу. Журналіст лічыць, што такім чынам міліцыянты спадзяюцца перашкодзіць яму ў спробе паехаць у Польшчу цераз Украіну.

Спадару Пачобуту раней анулявалі штамп у пашпарце, які дазваляе выезд “ва ўсе краіны сьвету”. Гэта было зроблена, каб актывіст непрызнаванага ўладамі Саюзу палякаў ня езьдзіў у Польшчу. Не зважаючы на гэта, журналіст трапіў у Варшаву праз Расею ды Украіну.

Калі ён вяртаўся з Польшчы дахаты — 20 кастрычніка на памежным пераходзе “Брузгі” беларускія памежнікі забралі ў яго пашпарт.

Андрэй Пачобут мяркуе, што пашпарт удалося вярнуць дзякуючы міжнароднаму розгаласу. Штамп на выезд за мяжу скасавалі апроч яго таксама тром ягоным калегам па СПБ — Юзафу Пажэцкаму, Веславу Кеўляку і Анджэю Пісальніку.

Міліцыянты патлумачылі, што гэта зроблена таму, што чатыры актывісты Саюзу палякаў зьяўляюцца падазраванымі ў крымінальнай справе аб запалохваньні Віктара Богдана — дырэктара шчучынскага Дому польскага. Сьледзтва па гэтай справе працягнута да 27 сьнежня, паведамляе «Радыё Свабода”.