Польскай журналістцы анулявалі беларускую візу і дэпартавалі :: Хартыя'97 :: Навiны

У 14.40 з аэрапорту “Мінск-2” меў вылецець самалёт, на якім журналістка польскага тэлеканалу TVP1 Агнешка Рамашэўска будзе дэпартаваная з Беларусі ў Польшчу. Пра гэта паведаміла прэс-службе ГА “Беларуская асацыяцыя журналістаў” сама журналістка незадоўга да вылету. У дакуменце аб дэпартацыі, які 14 снежня выдалі спн. Рамашэўскай, падстава гэткіх дзеянняў беларускага боку пазначана як “other reasons” – “іншыя прычыны”. Беларуская віза ў пашпарце журналісткі ануляваная.

Усю ноч А. Рамашэўска правяла ў пакоі для дэпартаваных пад аховай супрацоўнікаў памежнай службы. Сёння яе здымала Беларускае тэлебачанне: тэлежурналісты высвятлялі, ці ведае яна, за што яе дэпартуюць. Журналістка заявіла ў адказ, што яна пачуваецца як персанаж кнігі “Працэс” Франца Кафкі, які не ведае, за што яго пераследуюць. Па яе словах, яна ўвесь час старалася трымаць перад тэлекамерай сваё журналісцкае пасведчанне з афіцыйнай акрэдытацыяй.

А. Рамашэўска за апошнія месяцы падрыхтавала некалькі дзесяткаў матэрыялаў пра Беларусь: у тым ліку пра канфлікт вакол Саюзу палякаў Беларусі, пра першую акцыю салідарнасці 16 кастрычніка, пра Кангрэс дэмакратычных сілаў і г.д. Яна кажа, што, “магчыма, сустракалася тут з людзьмі, якія не падабаюцца беларускім дзяржаўным органам”, але ніякай дзейнасцю, акрамя журналісцкай, яна ў Беларусі не займалася.
Адносна магчымых крокаў у адказ з польскага боку спн. Рамашэўска лічыць за лепшае размаўляць пасля вяртання ў Варшаву.

У першы раз А. Рамашэўскай без тлумачэння прычын адмовілі ва ўездзе ў Беларусь 9 снежня. Пры гэтым журналістка мела не толькі дзейную беларускую візу, але і сталую акрэдытацыю МЗС Беларусі. Яна накіроўвалася ў Мінск, каб арганізаваць у Беларусі карпункт тэлеканалу TVP. Дакументы на акрэдытацыю прадстаўніцтва ўжо былі накіраваныя ў беларускае знешнепалітычнае ведамства.

Тым часам, выканаўца абавязкаў прэс-сакратара МЗС Беларусі Руслан Есін у сваім каментары журналістам зазначыў, што А.Рамашэўску не ўпусцілі ў Беларусь на законных падставах і “ў строгай адпаведнасці з законам РБ аб парадку перасячэння мяжы”. Па яго словах, дзеянні польскай журналісткі маюць “правакацыйны і недружалюбны характар”.