Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Апазыцыя прапануе ўвесьці візавыя санкцыі супраць шэфа КДБ 10:21, 20/12/2005
На паседжаньні Палітычнай рады апазыцыйнай кааліцыі на чале з кандыдатам на прэзыдэнта Аляксандрам Мілінкевічам быў ухвалены зварот да міжнароднай супольнасьці, буйных дзяржаваў сьвету і міжнародных арганізацыяў, у якім апазыцыя прапануе ўвесьці візавыя санкцыі супраць аўтараў паправак у Крымінальны кодэкс.
Як паведаміў «Радыё Свабода» сябра Палітрады Анатоль Лябедзька, зварот накіраваны да краінаў “вялікай васьмёркі” і сяброў Рады Бясьпекі ААН з прапановай ініцыяваць разгляд сытуацыі ў Беларусі на сваіх паседжаньнях.
Акрамя таго Палітрада аб’яднанай апазыцыі зьвярнулася да краінаў Эўразьвязу з прапановай увесьці візавыя санкцыі ў дачыненьні да тых, хто ініцыяваў і прымаў папраўкі ў Крымінальны кодэкс наконт адказнасьці за дыскрэдытацыю дзяржавы і органаў улады.
“Там маецца на ўвазе Натальля Пяткевіч, якая рыхтавала гэтае пытаньне ў прэзыдэнцкай адміністрацыі, Сьцяпан Сухарэнка, кіраўнік КДБ, і два кіраўнікі палатаў «нацыянальнага сходу”, -- патлумачыў Анатоль Лябедзька, каго канкрэтна яны маюць на ўвазе.
Акрамя таго, беларуская апазыцыя заклікала Эўразьвяз, Эўрапарлямэнт, Парлямэнцкія асамблеі Рады Эўропы і АБСЭ правесьці міжнародную канфэрэнцыю па Беларусі, на якіх маглі б быць выказаныя ўмовы, у якіх павінны адбывацца прэзыдэнцкія выбары.
