Следства ў справе супраць актывістаў Саюза палякаў працягнута яшчэ на месяц :: Хартыя'97 :: Навiны

Генеральная пракуратура працягнула яшчэ на месяц следства ў крымінальнай справе аб запалохванні дырэктара шчучынскага Польскага дому Віктара Богдана. Следства доўжыцца ўжо чатыры месяцы, падазраванымі ў справе з’яўляюцца намеснікі старшыні не прызнаванага ўладамі Саюзу палякаў Анжалікі Борыс Юзаф Пажэцкі і Веслаў Кеўляк, а таксама журналісты Анджэй Пісальнік і Андрэй Пачобут. Нядаўна справу перадалі з Шчучынскай раённай міліцыі ў Гарадзенскую абласную.

Паводле Андрэя Пачобута, пэўна ўлады не плануюць судовага працэсу над імі напярэдадні прэзідэнцкіх выбараў і тым жа часам яны не хочуць спыняць справу, каб трымаць усіх чатырох падазраваных у напружанні, абмяжоўваць іхнія дзеянні, – паведамляе радыё Свабода. У сувязі з расследаваннем ім скасаваны ў пашпартах штамп аб дазволе выезду ва ўсе краіны свету.

Як паведамляе ПАГОНЯ, крымінальная справа датычыць артыкула 185, у якім гаворыцца аб змушэнні да нейкіх дзеянняў і прадугледжвае пакаранне — да двух гадоў абмежавання волі. Спадар Богдан сцвярджае, што прадстаўнікі Саюза палякаў з Гродна змушалі яго пакінуць пасаду. У ліпені яны прыяжджалі да яго з мэтай праверыць, адкуль у Дома польскага мільённыя даўгі, але спадар Богдан адмовіўся прадставіць ім фінансавую дакументацыю. У канфлікце вакол СПБ ён ад пачатку займаў праўладны бок і лічыў кіраўніцтва Саюза на чале з Борыс нелегітымным.