Наклад «Народнай Волі» зноў затрымалі :: Хартыя'97 :: Навiны

На расейска-беларускай мяжы ізноў затрыманы наклад недзяржаўнай газэты “Народная Воля”. Цяпер 27 тысячаў асобнікаў выданьня знаходзяцца ў Дубровеньскім аддзяленьні ўнутраных справаў.

Як паведаміў “Радыё Свабода” галоўны рэдактар “Народнай Волі” Іосіф Сярэдзіч, ў панядзелак прыкладна а 15 гадзіне 27 тысячаў асобнікаў газэты затрымалі супрацоўнікі беларускай мытні на памежным пункце ў Рудні.

Як сьцьвярджае галоўны рэдактар “Народнай Волі” Іосіф Сярэдзіч, яму не было паведамлена пра прычыны затрыманьня накладу 3-га і 4-га падвоенага нумару газэты.

На мінулым тыдні гэтак жа на расейска-беларускай мяжы былі затрыманыя 1 і 2 падвоены нумар “Народнай Волі”. Супрацоўнікі міліцыі тлумачылі гэта тым, што суправаджальныя дакумэнты не былі аформленыя адпаведным чынам. 27 тысячаў асобнікаў амаль суткі знаходзіліся ў Дубровеньскім аддзеле ўнутраных справаў, потым газэты вярнулі выдаўцу.

Цяпер жа, паводле Іосіфа Сярэдзіча, усе дакумэнты на газэту аформленыя належным чынам. Спадар Сярэдзіч зьвязвае чарговае затрыманьне накладу газэты з палітычнай сытуацыяй у краіне.

З кастрычніка 2005 году “Народная Воля” вымушаная друкавацца за мяжой у Смаленскай друкарні. З 1 кастрычніка ўсе падразьдзяленьні “Саюздруку” ў аднабаковым парадку скасавалі з газэтай дамовы на распаўсюд. Манапаліст у сфэры падпіскі на пэрыядычныя выданьні прадпрыемства “Белпошта” не ўключыла “Народную Волю” у падпісны каталёг на першае паўгодзьдзе 2006 году.