Аляксандр Мілінкевіч у Парыжы: «Еўропа не мае права мірыцца з сітуацыяй у Беларусі» :: Хартыя'97 :: Навiны

Скончыўся афіцыйны аднадзённы візіт у Францыю кандыдата ў прэзідэнты Беларусі ад аб`яднаных дэмакратычных сіл Аляксандра Мілінкевіча. 9 студзеня ў Парыжы беларускі палітык правёў перамовы з міністрам замежных справаў Францыі Філіпам Дуст-Блазі, сустрэўся з дэпутатамі французскага парламента, шэрагам вядомых палітыкаў. Прапаноўваем некаторыя выказванні Аляксандра Мілінкевіча, зробленыя ім падчас афіцыйнага візіта ў Францыю.

“…У гэтай частцы Еўропы папулярная тэза, што трэці прэзідэнцкі тэрмін у Беларусі, а за ім, напэўна, і чацвёрты – безумоўна, ёсць злом, але злом, з якім неабходна змірыцца. Бо ў Беларусі, дзе яшчэ не сфармавалася нацыянальная ідэнтычнасць, нічога кепскага, што пагражала б бяспецы аб’яднанай Еўропы, здарыцца не можа.

Выснова, якую з гэтай тэзы робяць многія еўрапейскія палітыкі, простая: найлепей, проста чакаць, бо сёння важней не пабудова дэмакратыі, не свабода слова, не правы чалавека ў Беларусі, а захаванне бяспекі для аб’яднанай Еўропы. Аднак гэта зусім не так.

Стабільнасць, давер і прадказальнасць могуць быць толькі ў адносінах з дэмакратычнай краінай. Любая дыктатура, заўсёды нясе пагрозу бяспецы. І аб’яднанай Еўропе нельга забывацца на лёсы маіх суайчыннікаў, якія сёння адкрыта, не баючыся пераследу і рэпрэсій улады, выступаюць за перамены ў нашай краіне.

Я выступаю сёння супраць таго, што з дыктатурай на ўсходніх межах аб’яднанай Еўропы трэба мірыцца. Гэтая дыктатура вядзе амаль 10-мільённы народ у мінулае, да палітычных блокаў, якія доўгія дзесяцігоддзі падзялялі народы. Гэтая дыктатура ізалюе цудоўную краіну ў цэнтры Еўропы.

Наша мэта, мая і аб’яднаных дэмакратычных сіл – вяртанне дэмакратыі ў нашу Беларусь, пабудова краіны, якая ідзе да дабрабыту, якая будзе адкрыта і на Усход, і на Захад, якая пабудуе ўзаемавыгадныя адносіны і будзе надзейным мостам паміж Еўрапейскім саюзам і Расіяй, якая ўзбагаціць стасункі двух частак кантынента”, - заявіў Аляксандр Мілінкевіч.