Сям’я актывіста прадпрымальніцкага руху застаецца бяз працы :: Хартыя'97 :: Навiны

Рэчыцкія ўлады ліквідуюць сямейны бізнэс намесьніка старшыні рэспубліканскага аб’яднаньня прадпрымальнікаў “Пэрспэктыва” Леаніда Невара. Актывіст лічыць гэта помстай за грамадзка-палітычную дзейнасьць.

Як паведаміў “Радыё Свабода” намесьнік старшыні “Пэрспэктывы”, пры канцы сьнежня ў Менску ён браў удзел у сустрэчы прадпрымальнікаў зь віцэ-прэм’ерам Андрэем Кабяковым, дзе паінфармаваў пра перасьлед прыватнага бізнесу, а таксама крытыкаваў урад.

Спадар Невар летась быў пакараны 10-дзённым арыштам напярэдадні агульнанацыянальнага страйку дробных бізнэсоўцаў, які ён дапамог арганізаваць. Цяпер, паводле актывіста, яго сям’ю наагул пазбаўляюць прадпрымальніцкага занятку.

У Рэчыцкім райвыканкаме адмаўляюць сувязь паміж скасаваньнем прадпрымальніцкага пасьведчаньня і грамадзка-палітычнай дзейнасьцю Невара. Паводле прадстаўніцы райвыканкаму Алены Сяргеевай, жонка Невара, на якую аформлены дазвол на прыватны гандль, парушае падатковае заканадаўства.

Леанід Невар лічыць, што ініцыятыва ўладаў выклікана яшчэ і тым, што ён цяпер актыўна ўдзельнічае ў прэзыдэнцкай кампаніі. Актывіст прадпрымальніцкага руху зьяўляецца адным з каардынатараў ініцыятыўнай групы збору подпісаў за генэрала Валера Фралова.