Вядомые беларускія рок-гурты вымушаныя выступаць падпольна :: Хартыя'97 :: Навiны

У Менску адбыўся засакрэчаны канцэрт вядомага рок-гурту “Нэйра-Дзюбель”. Арганізатарамі імпрэзы выступілі студэнты – аматары творчасьці калектыву. Глядацкую аўдыторыю яны сабралі пры дапамозе знаёмых і сяброў. Аўтары ідэі называюць імпрэзу падпольнай і намерваюцца прадоўжыць аналягічныя канцэрты ў выглядзе акцый падтрымкі Аляксандра Мілінкевіча.

Памяшканьне на адзін пакой, імправізаваная сцэна й невялічкі бар – амаль поўнае начыньне клюбу. Адсутнасьць вонкавага ды сьветлавога афармленьня таксама сьведчылі на тое, што першапачаткова гэты клюб меў іншае прызначэньне. Нават удзельнікі кажуць, што з цяжкасьцю яго адшукалі.

Гледачоў сабралася больш за сотню, арганізатары й адміністрацыя папрасілі не казаць пра назву й адрэсу клюбу. Яны асьцерагаюцца перашкодаў з боку ўладаў падчас падрыхтоўкі наступных аналягічных імпрэзаў, бо плянуюць прымеркаваць іх да прэзыдэнцкіх выбараў.

“Плянуем зладзіць канцэрт гуртоў, якія сьпяваюць па-беларуску. Хочам зрабіць такую палітычную акцыю напярэдадні выбараў у падтрымку Мілінкевіча”, -- паведамілі арганізатары для “Радыё Свабода”.

Негалосная забарона на арганізацыю канцэртаў і выступленьне шэрагу папулярных беларускіх музыкаў у тэле й радыёэфіры распачалося пасьля іхнага выступленьня на пляцы Бангалор у часе мітынгу, арганізаванага да сканчэння 10-гадовага прэзідэнцкага тэрміну Аляксандра Лукашэнкі. Акцыя прайшла 21 ліпеня пазамінулага году пад лёзунгамі: "Не трэцяму тэрміну!", "Свабода Марынічу!" Сярод іншых удзел у канцэрце прынялі гурты “N.R.M.”, "Нэйра дзюбель","Палац", Аляксандр Памідораў і іншыя. Аднак незадаволенасьць імпрэзай выказаў Аляксандр Лукашэнка, і неўзабаве ўлады распачалі перасьлед усіх удзельнікаў, які доўжыцца й па сёньня.