Міліцыя спрабавала сарваць збор подпісаў у падтрымку Мілінкевіча :: Хартыя'97 :: Навiны

Як паведамляла прэс-служба штаба Аляксандра Мілінкевіча, 13 студзеня ў 13.00 на рынку "Ждановічы" пачаў сваю працу мабільны пункт збору подпісаў грамадзян у падтрымку Аляксандра Мілінкевіча. Каля зборшчыкаў подпісаў выстраілася агромністая чарга - падпісваліся як прадпрымальнікі, так і наведнікі рынку. Усе актыўна выказвалі сваю падтрымку адзінаму прэтэндэнту ад дэмакратычных сіл.

У 13.20 сябры ініцыятыўнай групы, якія збіралі подпісы за Аляксандра Мілінкевіча, былі затрыманы супрацоўнікам міліцыі Сяргеем Шыманскім, прычына затрымання не была растлумачана. Ніякага канкрэтнага абвінавачвання прад`яўлена не было. Людзі, якія сабраліся вакол пункта збору, актыўна пратэставалі супраць незаконнага затрымання, спрабавалі абараніць зборшчыкаў подпісаў.

Аднак сябраў ініцыятыўнай групы даставілі ў апорны пункт міліцыі, размешчаны на тэрыторыі рынку. Пачаліся ўзгадненні па тэлефоне з вышэйшымі органамі. У гэты час прадстаўнікі Мінскага гарадскога штаба адзінага пазванілі ў апорны пункт і патлумачылі неправамернасць затрымання. Міліцыянты паабяцалі выбачыцца і адпусціць зборшчыкаў подпісаў.

Але праз паўгадзіны сябры ініцыятыўнай групы былі дастаўлены ў Цэнтральны РУУС Мінска. Пасля ўзгаднення з яшчэ болей высокім начальствам іх адпусцілі. Прабачэнняў за неправамерныя паводзіны не паследавала.

Наступным пунктам збору подпісаў мабільнай групы павінна была стаць прахадная завода "Атлант". Можна меркаваць, што затрыманне адбылося з мэтай не дапусціць сустрэчу сябраў ініцыятыўнай групы з рабочымі завода.

Але, тым не менш, пункт збору подпісаў пачаў сваю працу каля прахадной завода. Рабочыя актыўна падпісваліся ў падтрымку Аляксандра Мілінкевіча.