Human Rights Watch канстатуе пагаршэньне сытуацыі з правамі чалавека ў Беларусі :: Хартыя'97 :: Навiны

Правабарончая арганізыцыя Human Rights Watch апублікавала штогадовую справаздачу аб сытуацыі ў галіне правоў чалавека ў 70-ці краінах сьвету за 2005 год. У абшырным дакумэньце, які налічвае больш як 500 старонак, адзначаецца, што за мінулы год сытуацыя з правамі чалавека ў Беларусі пагоршылася, паведамляе “Радыё Свабода”.

У дакумэньце пералічаныя найбольш яркія і гучныя выпадкі перасьледу апазыцыйных дзеячоў, недзяржаўных арганізацыяў і незалежных мас-мэдыяў. Згадваецца пра зьняволеньне Міхаіла Марыніча, Сяргея Скрабца, Міколы Статкевіча, Паўла Севярынца і Андрэя Клімава.

Сярод іншага таксама згадваюцца наступныя факты:

– пад ціскам з боку ўладаў былі вымушаныя спыніць альбо абмежаваць сваю дзейнасьць праваабарончыя арганізацыі – у прыватнасьці, Беларускі Хэльсынскі камітэт;

– у красавіку летась быў закрыты Інстытут cацыяльных, эканамічных і палітычных дасьледваньняў;

– у сакавіку нібыта за паклёп на Прэзыдэнта былі пакараныя штрафамі рэдактары газэты “ Згода”;

– у верасьні быў спынены распаўсюд газэты “ Народная воля”, якая акрамя таго павінна была заплаціць 50 тысяч даляраў штрафу нібыта за паклёп на аднаго з палітыкаў;

– у кастрычніку быў забіты журналіст Васіль Гроднікаў, які пісаў палітычныя артыкулы для “ Народнай волі”;

– амаль увесь мінулы год працягваўся перасьлед Саюзу палякаў Беларусі. Улады не прызналі абранае ў сакавіку кіраўніцтва Саюзу на чале з Анжалікай Борыс і арганізавалі выбары новага кіраўніцтва;

– у мінулым годзе беларускія ўлады выслалі некалькі замежных дыпляматаў і забаранілі ўезд у Беларусь дакладчыка камісі правоў чалавека ААН Адрыяна Сэвэрына.

У справаздачы зазначаецца, што пасьля дэмакратычных зьменаў у Грузіі, на Ўкраіне і ў Кіргызтане беларускія ўлады робяць ўсё магчымае, каб не дапусьціць чарговай каляровай рэвалюцыі ў часе прэзыдэнцкіх выбараў.

У справаздачы таксама шмат крытычных заўвагаў на адрас шэрагу краінаў: Паўночнай Карэі, Кітаю, Узбэкістану і Савудаўскай Арабіі. Блізкая да Беларусі Расея пад кіраўніцтвам Пуціна, паводле Human Rights Watch, імкліва ператвараецца ў аўтарытарную дзяржаву.