Эканамісты прэзэнтавалі праект праграмы Мілінкевіча ў Брусэлі :: Хартыя'97 :: Навiны

24 студзеня прадстаўнікі Нацыянальнага камітэту аб`яднаных дэмакратычных сілаў і экспэртнай супольнасьці Беларусі Яраслаў Раманчук і Леанід Заіка прадставілі ў Брусэлі праграму сацыяльна-эканамічнага разьвіцьця Беларусі.

Як паведамляе “Радыё Свабода”, падчас сустрэчаў з прадстаўнікамі Эўрапарлямэнту, Эўрапейскай камісіі й дыпляматычных службаў Раманчук і Заіка распавялі пра праект плятформы “Стань гаспадаром ў сваёй краіне”.

Як патлумачыў падчас онлайн-канфэрэнцыі на "Свабодзе" Аляксандар Мілінкевіч – "гэта праект плятформы аб’яднаных дэмакратычных сілаў, вынесены на ўсеагульнае абмеркаваньне Нацыянальным камітэтам. З улікам заўвагаў, дапаўненьняў і прапановаў да прапанаванага праекту, будзе завершана і мая праграма" – заявіў Аляксандар Мілінкевіч.

Падчас сустрэчаў у Брусэлі размова ішла ня толькі пра праграмныя палажэньні апазыцыі. Яраслаў Раманчук падкрэсьліў, што пасьля таго, як афіцыйны Менск запрасіў на выбары назіральнікаў ад АБСЭ, Эўразьвяз павінен асьцерагацца прызнаньня легітымнасьці Лукашэнкі ў выпадку фальсыфікацый. Намесьнік старшыні АГП заклікаў аб’яднаную Эўропу глядзець на сытуацыю па-за межамі выбарчых працэдураў.

"Я рэкамэндаваў бы і я прасіў бы краіны Эўразьвязу накіраваць як мага больш людзей – нават бяз статусу назіральнікаў, паколькі размова ідзе не пра назіраньне, а пра падтрымку народу, які бы дзейнічаў пасьля выбараў. Людзі з краінаў Эўразьвязу маглі б прыехаць за дзень-два да выбараў і застацца на наступныя два дні пасьля выбараў, паколькі асноўныя падзеі могуць разгарнуцца 20 сакавіка. Гэта можа быць сутыкненьнем сілаў, і гэта будзе рэальнай сутнасьцю гэтай палітычнай кампаніі", -- распавёў Раманчук “Радыё Свабода”.