Яшчэ адна крымінальная справа за палітычныя графіці :: Хартыя'97 :: Навiны

У ноч з 4 на 5 лютага на будынках у Ваўкавыску зьявіліся надпісы “Уходи!”. Надпісы на будынках зробленыя чорнай і чырвонай фарбамі у цэнтральнай частцы гораду, як на адміністрацыйных, так і на жылых дамах. Міліцыя завяла крымінальную справу “па факце хуліганства”. У нядзелю пасьля 19-й гадзіны адразу ў двух сяброў ініцыятыўнай групы Аляксандра Мілінкевіча -- Віктара Вайцюка і Віталя Гуляка — быў праведзены ператрус.

Як паведамляе “Радыё Свабода”, у кватэры Віталя Гуляка міліцыянты канфіскавалі беларускія каляндарыкі, сымболіку, газэты, часопісы. Потым актывіста адвезьлі ў міліцыю, дзе сьледчы дапытваў яго як сьведку па факце хуліганства. Ён патлумачыў, што ніякага дачыненьня да надпісаў на сьценах ня мае, у ноч з суботы на нядзелю быў дома і нікуды не выходзіў. Пасьля гэтага сьледчы яго адпусьціў.

“Думаю, цяпер пойдзе хваля ператрусаў — каб проста людзей запалохаць”, -- пракаментаваў дзеянні міліцыянтаў Віталь Гуляк.

У Віктара Вайцюка канфіскавалі кампутар, 140 плякатаў з аўтабіяграфіяй Аляксандра Мілінкевіча і некалькі нумароў справаздачы ААН аб правах чалавека. Ён таксама даваў паказаньні як сьведка. Праўда, яго больш распытвалі пра тое, дзе ён узяў матэрыялы, якія ў яго канфіскавалі.

Намесьнік начальніка Ваўкавыскай міліцыі Аляксандар Глебаў пацьвердзіў “Радыё Свабода”, што заведзена крымінальная справа па факце хуліганства, але больш размаўляць ня стаў, спаслаўшыся на занятасьць.

Нагадаем, што за графіці “Мы хочам новага” і “Достал!” у Беларусі ужо заведзены шэраг крымінальных справаў.