Марак Буцька: «Лукашэнка будуе палітыку на вобразе замежнага ворага» :: Хартыя'97 :: Навiны

У Польшчы пошук беларускімі ўладамі замежных ворагаў называюць “НКВДысцкім мысьленьнем”. Польскія экспэрты і грамадзкія дзеячы згодныя – праз прапагандысцкія фільмы і газэтныя матэрыялы беларускі рэжым напярэдадні выбараў спрабуе адвярнуць увагу беларусаў ад унутраных праблемаў краіны.

Былы намесьнік амбасадара Польшчы ў Беларусі Марак Буцька ня зьдзіўлены, што ягонае прозьвішча чарговы раз зьявілася ў прапагандысцкім фільме Беларускага тэлебачаньня.

“Я заўважыў, што я ўжо стаў дзяжурнай тэмай для беларускай прапаганды, калі трэба падтрымаць антыпольскія настроі. Напярэдадні выбараў Лукашэнка будуе сваю ўнутраную палітыку на стварэньні вобразу замежнага ворага. Што да выкарыстаньня майго прозьвішча ў гэтым, дык я не зьдзіўлюся, калі заўтра яны скажуць, што Буцька зьеў на сьняданак маленькую дзяўчынку ці перавозіў нелегальна празь мяжу кракадзілаў. Я думаю, што інтэлектуальны ўзровень гэтых перадачаў адпавядае ўзроўню тых, хто гэтыя перадачы рыхтуе і ўзроўню кіраўніцтва Беларускага тэлебачаньня”, -- паведаміў Буцька “Радыё Свабода”.

Паводле кіраўніка аддзелу Ўсходняй Эўропы Варшаўскага ўнівэрсытэту Яна Маліцкага, пошук замежных ворагаў, шпіёнаў, іншаземнай агентуры сьведчыць аб “мысьленьні ў стылі НКВД”.

У сваю чаргу дырэктар дэпартамэнту інфармацыі МЗС Польшчы Павал Дабравольскі заявіў “Радыё Свабода”, што міністэрства пакуль што вывучае сытуацыю і таму афіцыйна не камэнтуе абвінавачаньняў беларускіх дзяржаўных мэдыяў на адрас польскіх дыпляматаў.