Старшыня Сэнату Польшчы: «Менск вырашыў пайсьці на абвастрэньне» :: Хартыя'97 :: Навiны

Маршалак Сэнату Польшчы Богдан Барусэвіч заявіў «Радыё Свабода», што рашэньне беларускіх уладаў не пусьціць не прызнаваную афіцыйным Менскам старшыню СПБ Анжаліку Борыс у Польшчу сьведчыць аб тым, што, нягледзячы “на ранейшыя сыгналы ад беларускага боку аб жаданьні нармалізацыі польска-беларусіх дачыненьняў”, Менск вырашыў пайсьці на “абвастрэньне сытуацыі”.

Маршалак Сэнату Польшчы Богдан Барусэвіч сказаў, што рашуча пратэстуе супраць захадаў беларускіх уладаў, якія не дазволілі Анжаліцы Борыс прыехаць у Варшаву на першае паседжаньне Палянійнай кансультацыйнай рады, сябрам якой Борыс зьяўляецца.

“Тое, што спадарыні Борыс не дазволілі выехаць у Польшчу, сьведчыць аб тым, што сытуацыя ў Беларусі абвастраецца. Такі крок напэўна не палепшыць дачыненьняў паміж Польшчай і Беларусьсю. Раней былі сыгналы зь Беларусі, што Менск хоча дасягнуць кампрамісу. Але мы аналізуем не дэклярацыі ці нейкія тайныя паведамленьні, а факты. Факты сьведчаць аб тым, што Лукашэнка і ягоная адміністрацыя ня хочуць нармалізацыі польска-беларускіх дачыненьняў – яны, наадварот, ідуць на абвастрэньне, каб напярэдадні выбараў паказаць, што Польшча і палякі ўмешваюцца ва ўнутраныя справы Беларусі. Мы ня ўмешваемся ва ўнутраныя справы, але ня будзем маўчаць, калі парушаюцца правы чалавека. Права на паездкі – гэта адно з асноўных правоў чалавека, якога нельга вось проста так пазбавіць”, -- паведаміў старшыня Сэнату “Радыё Свабода”.

Паводле Богдана Барусэвіча, пра тое, што спадарыні Борыс, якая ехала ў Польшчу на афіцыйнае запрашэньне маршалка польскага Сэнату, не дазволілі выехаць зь Беларусі, будуць афіцыйна паінфармаваныя прэзыдэнт і прэм’ер-міністар Польшчы.

Калі б Анжаліка Борыс перасекла беларуска-польскую мяжу, яна сярод іншага сустрэлася б сёньня з польскім прэзыдэнтам.