Тадэвуш Гавін зьбіраецца судзіцца з БТ :: Хартыя'97 :: Навiны

Пазаўчора беларускае тэлебачаньне паказала шырока разрэклямаваны фільм пад назвай “Агент 590”. Паводле аўтараў, супрацоўнікі польскай амбасады ў Менску нібыта займаліся зборам разьведдазеных. У стужцы прагучалі таксама абвінавачаньні на адрас заснавальніка Саюзу палякаў Беларусі Тадэвуша Гавіна. З гэтай прычыны ён будзе зьвяртацца ў суд, паведамляе “Радыё Свабода”.

У фільме называліся прозьвішчы многіх польскіх грамадзянаў, а зь беларускіх узгадалі толькі Тадэвуша Гавіна: нібыта замежныя дыпляматы актыўна задзейнічалі яго ў антыбеларускай кампаніі.

“У нармальнай дзяржаве такое нават не магло б зьявіцца. Буду падаваць у суд на Беларускае тэлебачаньне, адвакат ужо займаецца гэтым пытаньнем. Прычым, гэты фільм выклікаў нэгатыўную рэакцыю. Яны мне толькі імідж падымаюць, бо ніхто ўжо ня верыць гэтаму тэлебачаньню, ужо нармальныя людзі ня хочуць яго глядзець”, -- пракаентаваў сытуацыю Тадэвуш Гавін.

Спадар Гавін гаворыць, што яму тэлефанавалі знаёмыя, выказвалі падтрымку. Дарэчы, яшчэ адзін сябра Саюзу палякаў, не прызнанага ўладамі, Андрэй Пачобут накіраваў заяву генэральнаму пракурору Пятру Міклашэвічу. Спадар Пачобут даводзіць, што беларускія палякі былі наўмысна прыніжаныя стваральнікамі фільма, паказанага па Беларускім тэлебачаньні.