З Магілёўскага ўнівэрсытэту выключылі актывістку «Зубра» :: Хартыя'97 :: Навiны

Актывістка маладзёвага супраціву “Зубр” Марына Цьвяткова адлічаная з другога курсу Магілёўскага дзяржаўнага ўнівэрсытэту імя А.Куляшова, дзе яна навучалася на журналісцкім аддзяленьні факультэту славянскай філялёгіі.

У студзені сёлета Марына Цьвяткова разам з актывістам “Зубра” Яўгенам Суворавым была затрыманая супрацоўнікамі Кастрычніцкага РАУС Магілёва падчас распаўсюду газэты “Твой выбар”. У той раз усё скончылася так званай “прафіляктычнай гутаркай”.

Але, пасьля таго, як Марына 16 студзеня разам зь іншымі актывістамі руху накіроўвалася з абласнога цэнтру на акцыю салідарнасьці ў Менск і была затрыманая супрацоўнікамі ДАІ, на яе пачалі ціснуць. Пастаянныя званкі паступалі на адрас дзяўчыны, пазьней “праваахоўнікі” пачалі тэлефанаваць яе бацькам.

Марыну неаднойчы выклікаў у міліцыю ўчастковы інспэктар Ленінскага РАУС Магілёва Аляксандар Падабед. Ён тлумачыў гэта тым, што з актывісткай “Зубра” хочуць паразмаўляць людзі з спэцыяльных органаў.

Амаль адначасова ў Марыны пачалі зьяўляцца праблемы з вучобай. У прыватнасьці, са здачай сэсіі. Хаця раней яна, як актывістка студэнцкага савету інтэрнату, была нават уключаная ў сьпіс студэнтаў, якіх запрасілі на сустрэчу з А.Лукашэнкам у лістападзе. Аднак потым, відаць, пасьля пэўных узгадненьняў, дзяўчыну са сьпісу выкрасьлілі.

У прыватнай гутарцы з Марынай намесьнік дэкану факультэту славянскай філялёгіі Ўладзімер Дзянісаў заявіў, што яе лёс абмяркоўваўся ў рэктара ўнівэрсытэту, а прычына яе выключэньня – палітычныя погляды студэнткі. Калі Марына спытала па якім артыкуле яе выключаюць, Дзянісаў зьедліва паведаміў, што ўсё будзе банальна і яе выключаць “за непасьпяховасьць”.

“Такім чынам, мы бачым, што ўлады любымі сродкамі імкнуцца спыніць пратэсты ў грамадзтве. Таксама, варта заўважыць, што загад міністра адукацыі Радзькова, які дазваляе выключаць з навучальных установаў за альтэрнатыўныя погляды, на справе ня дзейнічае. Улада, разумеючы недарэчнасьць гэтага дакумэнту, разьбіраецца з іншадумствам старымі спосабамі”, – пракамэнтаваў выключэньне з унівэрсытэту Марыны Цьвятковай актывіст “Зубра”.

Актывістка маладзёвага супраціву “Зубр” Марына Цьвяткова