«Gazeta Wyborcza» піша аб салідарнасьці зь Беларусьсю :: Хартыя'97 :: Навiны

Цэнтрысцкае польскае выданьне “Gazeta Wyborcza” працягвае тэму салідарнасьці зь Беларусьсю ў артыкуле пад назовам “Польска-беларускі рок”. “Трэба падтрымліваць беларускіх музыкантаў,” – гаворыць Джэй Джэй з гурту Big Cyc, які сёньня падтрымае дэманстрацыю салідарнасьці зь беларускай апазыцыяй і заграе з забароненым беларускімі ўладамі гуртом “Нэйра Дзюбель”. У Беларусі пра канцэрты гурта можна даведацца толькі дзякуючы падпольнай пошце, няма ніякіх плакатаў, аб’яваў. Альбомы гурта купляюцца з - пад прылаўка.

Падтрымліваць іх будзе Big Cyc сваёй новай песьняй “Дыктатар”. “Я задаволены, што мы будзем граць разам зь імі. У 1989 годзе мы езьдзілі ў Заходні Бэрлін і там у клюбе Loka маглі граць ад пачатку да канца такі канцэрт, які мы хацелі,” — кажа Джэй Джэй. Ён успамінае, як у Польшчы 80-х гадоў на рэпетыцыі й канцэрты прыходзіў цэнзар, як побач заўсёды былі працаўнікі спэцслужбаў.

Джэй Джэй мяркуе, што пісаньне песьняў, кніг альбо кожная іншая творчасьць не выходзіць, калі аўтары знаходзяцца пад кантролем. “Музыканты ў намордніках ніколі не зрабілі нічога каштоўнага. Некалі ў Польшчы была інстытуцыя кантролю прэсы, публікацый і публікі. Перш чым што-небудзь запісаць, трэба было атрымаць іхную згоду зь пячаткай. Пра тое, што мы хочам заграць разам з “Нэйра Дзюбелем” мы вырашылі цягам 10 хвілін,” – прызнае Джэй Джэй.

У час калі пачнецца канцэрт, у Беларусі людзі ў сваіх вокнах запаляць сьвечкі ў падтрымку апазыцыі. А 18 гадзіне многія з іх выйдуць на Кастрычніцкую плошчу з запаленымі свечкамі.

Паводле Польскага радыё