На пікеце ля беларускай амбасады ў Вашынгтоне выступіў кангрэсмэн :: Хартыя'97 :: Навiны

У сталіцы Злучаных Штатаў Амэрыкі Вашынгтоне, ля беларускай амбасады, адбылася акцыя салідарнасьці з беларускай дэмакратыяй. Яе арганізавалі актывісты новаўтворанай арганізацыі “Погляд”, якая аб’ядноўвае студэнтаў з розных краінаў сьвету – у тым ліку і зь Беларусі грамадзянскую ініцыятыву “Мы помнім”, якую ўзначальвае жонка зніклага бізнесоўцы і грамадзкага дзеяча Ірына Красоўская.

Як паведамляе “Радыё Свабода”, каля 30-ці чалавек сабралася ля беларускай амбасады, якая знаходзіцца ў цэнтры Вашынгтону. Людзі трымалі партрэты зьніклых зь іхнымі імёнамі, плякаты з надпісамі: "Прасыгналь за дэмакратычную Беларусь!" (для кіроўцах аўтамабілей, якія едзяць па вуліцы), "Спыніце апошнюю дыктатуру ў Беларусі!", а таксама партрэт Тацьцяны Хомы з заклікам спыніць рэпрэсіі супраць студэнтаў.

Вось, што перадала з Вашынгтону карэспандэнтка “Радыё Свабода” Ірына Віданава:

“Сёньня вельмі цёплы сонечны дзень, спрыяльны для дэманстрацыі. Да нас падыходзіў кангрэсмэн Макартур, які выступіў перад намі ў падтрымку дэмакратычнага руху ў Беларусі, са словамі салідарнасьці з тымі, хто цяпер знаходзіцца ў зьняволеньні за палітычныя погляды.

Тут прысутнічаюць прадстаўнікі беларускай дыяспары, амэрыканскія студэнты, прадстаўнікі балтыйскай дыяспары, розных міжнародных арганізацыяў – даволі шмат людзей, урачысты настрой.

Амбасада зачыненая: як і ў папярэднія разы, яны зачынілі дзьверы, зашморгнулі фіранкі на вокнах у той момант, калі мы пачалі пікет а 10-й раніцы. Мы будзем тут знаходзіцца да 16:00, і практыка мінулых разоў паказвае, што ўвесь гэты час ніхто з супрацоўнікаў амбасады не заходзіць і не выходзіць зь яе."