Гомельскія актывісты раздаюць лістоўкі ля гарвыканкаму :: Хартыя'97 :: Навiны

Сёньня ў Гомелі прадстаўнікі каманды кандыдата ад дэмакратычных сілаў Аляксандра Мілінкевіча выйшлі да гарвыканкаму ды іншых адміністрацыйных будынкаў, каб раздаваць агітацыйныя матэрыялы. Гэта зроблена на знак пратэсту супраць затрыманьняў, канфіскацыі ў распаўсюднікаў буклетаў, складных столікаў, пляншэтаў з партрэтамі Мілінкевіча, паведаміла “Радыё Свабода”.

Актывісты штабу адзінага кандыдата Андрэй Толчын ды Кацярына Гаравая раздавалі буклеты Мілінкевіча на рагу вуліцаў Савецкай і Сялянскай, дзе разьмяшчаецца Гомельскі гарвыканкам.

“Цяпер мы будзем агітаваць тут, пад сьценамі гарвыканкаму, каб бачыла гарадзкая камісія, каб бачылі людзі, што мы не баімся. І каб яны не баяліся таксама. Гэта вельмі станоўча ўзьдзейнічае на дух выбарцаў, настрой людзей. Я спадзяюся, што людзі перамогуць свой страх і 19 сакавіка прагаласуюць за свабоду”, -- заявіла ў інтэрв’ю “Радыё Свабода” прадстаўніца штаба Аляксандра Мілінкевіча Кацярына Гаравая.

Каля гадзіны агітатары раздавалі буклеты Аляксандра Мілінкевіча ля гарвыканкаму, дзе ў гэты час засядала гарадзкая выбарчая камісія. Потым да гарвыканкаму пад’ехала міліцэйская аўтамашына і забрала Андрэя Толчына і Кацярыну Гаравую ў пастарунак. Затрыманы быў і Юрась Захаранка, што раздаваў улёткі за квартал ад гарвыканкаму. Але на месца затрыманых да будынку выканкаму прыйшлі новыя агітатары — Аляксандар Каротчанка ды Марыя Багдановіч. Міліцыянты іх таксама спрабавалі затрымаць, але яны катэгарычна адмовіліся ехаць у пастарунак. Тады міліцыянты папрасілі іх адысьці крыху ад гарвыканкаму. Агітатары пагадзіліся, і канфлікт ня меў працягу.