Дэмакраты ездзяць па ўсей краіне :: Хартыя'97 :: Навiны

У Ашмянах і мястэчку Казлоўшчына Дзятлаўскага раёна сёньня адбыліся сустрэчы з даверанымі асобамі адзінага кандыдата ад дэмакратычных сілаў А.Мілінкевіча Анатолем Лябедзькам і Аляксандрам Дабравольскім. Сустрэчы адбываліся ў гарачых дыскусіях. Падсумоўваючы іх вынікі, арганізатары прыйшлі да высновы, што яны далі плён. Мерапрыемствы абудзіла местачковых людзей. Яны даўно ня чулі альтэрнатыўнай думкі і не сустракаліся з людзьмі, якія могуць крытыкаваць палітыку А.Лукашэнкі.

Як паведамляе “Радыё Сабода”, у Ашмянах зала раённага Дома культуры была запоўнена цалкам. Але мясцовая “вертыкаль” спрабавала зладзіць правакацыю. Некалькі прадстаўнікоў ўлады і БРСМ прыйшлі на сустрэчу з Анатолем Лябедзькам са сваімі сьцягамі. У зале на сьценах віселі некалькі плакатаў з надпісам “За Беларусь!”

Пытаньні ў асноўным стараліся задаваць таксама прадстаўнікі “вэртыкалі” і БРСМ, паколькі ў іх у руках знаходзіўся мікрафон і яны перадавалі яго адзін аднаму. Прычым, пытаньні, як правіла, не датычыліся праграмы А.Мілінкевіча, а былі скіраваны на тое, каб дыскрэдытаваць асобу А.Лябедзькі.

Анатоль Лябедзька адказваў вельмі спакойна на ўсе пытаньні, і зала яму апладзіравала.

“Улада паказала, што яна сабой уяўляе: які прэзыдэнт, такая і ўлада ў раёнах. Я магу сказаць так”, -- сказаў “Радыё Свабода” на гэты конт кіраўнік ініцыятыўнай групы А.Мілінкевіча ў Ашмянах Пётра Явідовіч.

Сябры ініцыятыўнай групы Мілінкевіча неаднаразова рабілі заўвагі, заклікалі да парадку, сустрэча некалькі разоў перарывалася. Але ў той самы час і сябры ініцыятыўнай групы, і выбаршчыкі, якія прысутнічалі ў зале, казалі, што нечага падобнага ў іх горадзе не было ўжо шмат гадоў.

У мястэчку Казлоўшчына Дзятлаўскага раёна ў мясцовым Доме культуры было таксама горача. Сцэнар сустрэчы з Аляксандрам Дабравольскім нагадваў ашмянскі варыянт.

Аляксандар Дабравольскі адказваў на ўсе пытаньні таксама спакойна. “Вэртыкалі” і БРСМаўцам часта адказы не падабаліся, і тады ў зале панаваў шум.

Падсумоўваючы вынікі сустрэчы, яе арганізатары прыйшлі да высновы, што яна дала плён. Па словах Пятра Цярэшкі, кіраўніка ініцыятыўнай групы А.Мілінкевіча ў Дзятлаўскім раёне, мерапрыемства абудзіла местачковых людзей. Яны даўно ня чулі альтэрнатыўнай думкі і не сустракаліся з людзьмі, якія могуць крытыкаваць палітыку А.Лукашэнкі.

qqqqq