У Дзень салідарнасці ў Вільні адбудзецца канцэрт N.R.M. :: Хартыя'97 :: Навiны

Літву ўпершыню наведае найпапулярнейшы беларускі рок-гурт “N.R.M.“. У Вільню гурт прыедзе 16 сакавіка для ўдзелу ў традыцыйнай “Акцыі беларуска-літоўскай салідарнасці”, якую ўжо ў пяты раз ладзіць Аб’яднаны цэнтр беларускіх ініцыятыў (JuBIC) у Вільні.

Акцыя ўжо прыцягнула вялікую ўвагу з боку зорак літоўскай эстрады і палітыкі – акрамя звычайных аматараў року і прыхільнікаў дэмакратыі ў Беларусі, мерапрыемства наведаюць знакамітыя ў Літве Андрюс Мамонтовас, лідар гурта “Інкульто” Юргіс Діджюліс, а маладзёвы гурт “Скайдэрс” саспявае і некалькі песняў разам з “энэрэмаўцамі”.

“Канцэрт прадэманструе Літве вольную, смелую, дзёрзкую Беларусь. Рок – самы дэмакратычны кірунак музыкі, непадуладны ніякаму ўціску, таму ня дзіва, што ў Беларусі ён цяпер перажывае ўздым. Спадзяемся ўвагі таксама і з боку тых, хто мала цікавіцца палітыкай і каму, магчыма, ужо крыху надакучылі тыя ж самыя фразы пра дыктатуру ў Беларусі, але хто хоча ўжывую дакрануцца да культуры суседняй краіны,” – кажа старшыня JuBIC Вадзім Вілейта.

Паў-забаронены ў Беларусі, “N.R.M.“ паспяхова канцэртаваў у Нямеччыне, Украіне, Польшчы, а ў Вільні іх канцэрт „Revolution Rock“ напярэдадні беларускіх прэзідэнцкіх выбараў будзе прымеркаваны да Акцыі салідарнасці, што ладзіцца штомесяц 16 дня. Акцыя накіраваная на тое, каб нагадаць сусветнай грамадскасці аб становішчы ў Беларусі.

Канцэрт адбудзецца 16 сакавіка а 20.00 у сталічным клубе INTRO (Maironio 3, каля касцёла Св.Ганны). На 13.30 прадугледжаная прэсавая канферэнцыя з удзелам музыкаў і арганізатараў у інфармацыйнай агентуры BNS (Ягелонская 9/1). Праект падтрымаў Фонд спрыяння абароны грамадзян.