Мы зламалі страх у грамадзтве! :: Хартыя'97 :: Навiны

Штабы кандыдатаў у прэзыдэнты Аляксандра Мілінкевіча і Аляксандра Казуліна падсумоўваюць страты – адабраную друкаваную прадукцыю і колькасьць арыштаваных актывістаў. Гаворка ідзе пра сотні тысяч паасобнікаў агітацыйных матэрыялаў і пра дзясяткі людзей, якія працавалі на карысьць кандыдатаў або проста прыйшлі на сустрэчу з кандыдатамі і былі пазбаўленыя волі напярэдадні галасаваньня. Тым ня менш кіраўнікі штабоў адзначаюць, што атмасфэра, якая запанавала ў грамадзтве, дае ім падставы для аптымізму.

Cябры ініцыятыўных груп адчулі падтрымку грамадзкасьці. Гаворыць прэсавы сакратар Аляксандра Мілінкевіча Павал Мажэйка:

“Лічым, што дасягнулі ў гэтай кампаніі самай важнай мэты – зламалі страх у грамадзтве. Ужо адчуваецца пах пераменаў. Гэты пах выклікае людзей на вуліцу. Сёньня людзі тэлефануюць, прыходзяць, кажуць: “Дайце якую-небудзь працу. Я хачу быць карысным, хачу ўзяць удзел у гэтых гістарычных падзеях”. Мы сёньня зьяўляемся сьведкамі жывой гісторыі, якая зьдзяйсьняецца на нашых вачах. Усё тое, што адбываецца ў гэтыя дні і будзе адбывацца 19-га, пасьля абавязкова ўвойдзе ў падручнікі найноўшай гісторыі Беларусі”, -- заявіў Мажэйка "Радыё Свабода".

Студэнтка Вераніка Шабанава тры дні таму была ў Польшчы. Яна кажа, што калі вярнулася і прыйшла на заняткі, то адразу заўважыла, як за кароткі час зьмяніўся настрой у студэнтаў і выкладчыкаў.

“Усе гэтыя арышты і гэтае датэрміновае галасаваньне толькі падштурхоўваюць наш народ да зьменаў. Яны падштурхоўваюць прыняць ўрэшце гэтае рашэньне і прыкласьці ўсе намаганьні, каб зьмяніць сытуацыю ў нашай краіне. Цяпер ужо ня будзе так, як раней. Улады самі не заўважылі, як апынуліся ў іншым грамадзтве, і ў гэтым грамадзтве ім ужо няма месца”.

Сёньня не працуюць суды, таму больш за дзясятак затрыманых учора актывістаў апазыцыі будуць знаходзіцца да суду ў спэцпрымальніках. Журналісты будуць высьветляць лёс сямёх дэпутатаў парлямэнту Грузіі, якіх затрымалі яшчэ 16 сакавіка і ўтрымлівалі на тэрыторыі Нацыянальнага аэрапорту “Менск”.

qqqqq