Рэдактара газэты «Мясцовы час» зноў арыштавалі :: Хартыя'97 :: Навiны

Пінскі гарадзкі суд сёньня арыштаваў на 6 сутак Аляксандара Ярашука — галоўнага рэдактара пінскай рэгіянальнай газэты “Мясцовы час”. Журналіста абвінавацілі ў брыдкаслоўі й супраціве міліцыянтам. Пра тое, што адбылося напраўду, паведамляе супрацоўніца незалежнага выданьня Надзея Андрэйкавец:

(Андрэйкавец: ) “Ён патэлефанаваў нам, калегам, раніцай і сказаў, што за ім ёсьць “хвост”. Запэўніў, што гатовы да ўсяго, бо яго забяруць. У міліцыю мы зьвярталіся шмат разоў, але спачатку казалі, што няма, няма... Пасьля: “Пакуль няма, але па рацыі паведамілі, што хутка даставяць”. Дзе міліцыянты так доўга вазілі Ярашука, мы пакуль ня ведаем. Лічым, што чарговае затрыманьне зьвязана менавіта з газэтай”.

Рэдактар гэтага незалежнага выданьня Віктар Ярашук у панядзелак быў выпушчаны на волю пасьля арышту на 5 сутак. Сёньня ён ізноў арыштаваны.